تامر حسني: أنا مش شيخ .. واحنا كبشر لازم نقوي بعض

طلب الفنان تامر حسني من جمهوره ومتابعيه أداء الصلاة في مواعيدها وذلك من خلال منشور كتبه على صفحته الشخصية على موقع التواصل الإجتماعي “فيس بوك”، وأكد أنه لا يحثهم على ذلك كونه شيخًا أو فنان مشهور ولكنه يتحدث إليهم كونه إنسانًا، مشيرا أنه كان غير مواظب على الصلوات في موعدها ولكنه في النهاية واظب عليها.

وكتب تامر،: "إنت مش منافق إنت مجاهد، بوست طويل بس اللي هيقرأه للآخر هيكون محتاجه جدًا والله العظيم،  بخصوص الصلاه أنا هحكي حاجة حصلت معايا حبيت أشارككم بيها للي يهمه الأمر،  فيه أكيد فيكم  حد مش بيصلي أو بيقطع في الصلاة اللي بيقطع في الصلاة عايز أقول،  أفضل قاوم شيطانك لحد ما تنتصر عليه،  ده حصل معايا شخصيًا  كنت أواظب وأقطع 100 مرة لحد ما استقريت، خد وقت وثوابك هيكون أكبر لأنك بتجاهد نفسك وشيطانك عشان خاطر ترضي ربنا،  فيه نوع تاني اللي بيقول هبدأ من بكرة وميقدرش ويقول معلش بكرا وميقدرش تالت وميقدرش عاشر عايز  أقوله حتى لو عزمت النيه 1000 مرة ومش بتنفذ ربنا بيفضل مستنيك بمنتهى الحب لإنه شايف مجهود نيتك في الإصرار على الرغبة حتى لو مش قادر تنفذ وربنا هيجازيك خير برضو على رغبتك حتى لو منفذتش لسة وهيبقى مستنيك تاخد القرار وفاتحلك إيده بكل حب عشان تنطلق وتدخل في رحمته وفي معيته".

وأضاف تامر حسني،: "في الوقت دة بيبقى حواليك ناس يا بيشجعوك ودول ناس تمسك فيهم، يا ناس مش بتصلي ياريت تبعد عنهم هما مش عايزينك تصلي غيرة منك لإنهم من جواهم مقتنعين بربنا بس بيكابروا فبيزعلوا عشان متبقاش أحسن  منهم عند ربنا حتى لو في شيء من الذنوب بتعملها عادي كلنا بنغلط  أوعى تخليهم يقولولك يا عم أنت بتعمل ذنب كذا وكذا ازاي تصلي يا منافق لاوألف لا أنت مش منافق أنت بتجاهد نفسك وشيطانك يعني في تحدي أكبر ثوابه أكبر بكتير عشان بقى خاطر ربنا غالي عندك وبتعمل اللي هو عايزه إنك تصلي وكل ما تغلط تروحله هو بيحب كده وهيسامحك عادي، ولو غلطت وروحتله 1000 مرة المهم إن كل مره يبقى عندك نية الارتقاء بنفسك معاه وتتصدق كتير صدقوني في قوة خارقة في تأثير الصدقة وفي كل ذنب عليكم بالناس البسطاء فرحوهم أوي".

واختتم تامر حسني،: "ربنا هيفرحك أوي أوي، أنا مش شيخ يا جماعة ومش بتكلم كفنان لا أنا بتكلم كإنسان أنا بقالي سنين يمكن من أكتر الناس اللي بتقرأ في العالم في كل الاتجاهات أنا فعلًا بصحى من النوم كل يوم  بثقف نفسي وكل حرف بعرفه وكل معنى جميل أعرفه بحب أوصله ليكم دي إنسانيات عشان إحنا كبشر أخوات لازم نقوي بعض، المهم الناس لازم تفرق بين معاملة البشر للبشر ومعاملة ربنا للبشر، يعني البشر لو مسألتش فيه يومين هو مش هيسأل فيك 10 وهيردهالك بس ربنا مش كدة اوعوا تشوفوا ربنا بيعاملنا كده،  ربنا يعني الرحمة كلها بالعكس بيفضل يناديلك كل يوم 5 مرات ولسنين  وأنت مش بترد وبيقولك أنا أكبر من اللي بتعمله تعالى أصلحلك روحك وأشوف احتياجاتك وأشفيك وأريح قلبك وأنت بتهمله ومش مرة لا سنين كتير وكل يوم 5 مرات ينادي بعظمته وجلاله وأنت برضو مش بترد ونسمعه بيقول في الآذان الله أكبر يعني يا فلان مهما كنت بتعمل إيه أنا اكبر وأعلى،  خد مصلحتك واعمل لروحك صيانة ومش ببلاش لا دة ربنا ساعتها بيكتبلك ملايين النجاحات والأموال والرحمات وإسقاط الذنوب ويفديك ويشفيك وينور بصيرتك كفاية اسمك هيبقى مع الناس اللي مكرمهم تحت معيته وحمايته".

إقرا أيضًا:حميد الشاعري يعلن تضامنه مع القضية الفلسطينية بكل لغات العالم