بكلمات مؤثرة.. رانيا فريد شوقي توجه رسالة لشقيقتها الراحلة ناهد

وجهت الفنانة رانيا فريد شوقي رسالة مؤثرة لشقيقتها المنتجة الراحلة ناهد فريد شوقي والتي رحلت عن عالمنا أول أمس بعد صراع مع المرض.

وكتبت رانيا فريد شوقي "للأسف بنتعود على وجود  الأحباب فى الدنيا  كأنهم خالدين زي ما بنعتاد النعم كأنها موجودة إلى الأبد و دة من عيوب البشر،  أختي الحبيبة الغالية ناهد انا بعتذر لك لأني اتعودت على وجودك  في حياتي يمكن خيالي كان أضعف من إني اتصور فراقك، يمكن خدتنا مشحانات الدنيا وربنا نور بصيرتنا ورجعنا لحضن بعض والحب اللي اتربينا عليه من صغرنا  وحبنا لبابا كان دايما بيجمعنا يمكن لأني نسيت اننا بنكبر كلنا يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة إسمها استسلام وارادتها من حديد".

وتابعت" قوتك  دي كانت بتخليني مطمنة عليكي، أنا مش عارفه أنا بكتب ايه بس اللي حساه أكبر بكتير من أي كلام، لسة  مش مستوعبة ولما حد بيقول الله يرحمها بتخض في الفترة الأخيرة كنت بشوف فيكي بابا بكل حركاته وطريقة كلامه ونظراته وهزارك و قولت للأحفاد اللي مشافوش جدهم ناهد بقت نسخه من جدكم لما تشوفوها كأنكم شفتوه سبحان الله".

وأستكملت"والغريب اني من الناس اللي بتخاف تدخل على حد متوفي لأنه بيبقي آخر انطباع بيفضل في الذاكرة عن الشخص لكن لما دخلت و شوفت وشك مبتسم كأنك نايمة و بتحلمي حلم جميل حسيت انك شوفتي فريد ابنك  وخدك لحبايبك بابا وطنط هدي ومها أختنا دة تفسيري لابتسامتك الهادية الجميلة الواضحة أوي اللي هونت علينا كلنا فراقك، واللي مش هتفارقني اللي باقي من عمري كنتي راضية بقدر الله، سلميلي على بابا إلى ان نلتقي يا أختي سلميلي على بابا و قوليله الحياة من غيرك مش حياة و نفسي يجيلي في الحلم بقاله فترة غايب عني هتوحشيني اوي يا حتة من ابويا و من قلبي".

إقرأ أيضا:الشرطة تفتش منزل آدم ويحيى يتصل بندى.. تفاصيل الحلقة الثامنة من العودة