عمرو سلامة: "أفلام وحيد حامد وعادل إمام لا يُسمح بها حاليًا"
كشف المخرج عمرو سلامة عن رأيه في الرقابة على المصنفات الفنية، واصفًا هذا القانون بأنه مطاطي بشكل كبير، وأكد أن أفلام الكاتب الراحل وحيد حامد، لا يصلح عرض مثلها في الوقت الحالي.
قال المخرج عمرو سلامة في تصريحات تليفزيونية: "أنا بالصدفة كنت بتفرج على خمس أفلام ورا بعض بحبهم جدًا، وهما الخماسية بتاعة عادل إمام والمؤلف وحيد حامد والمخرج شريف عرفة، مفيش ربع ساعة في أي فيلم فيهم يُسمح بيها النهارده، الأفلام دي مكنتش عن العُري، ولكن كانت بتناقش مشاكل حقيقية في المجتمع وبتمثل شخصيات واقعية".
عمرو سلامة: المجتمع يقدر يفرض إرادته على المبدع
وتابع عمرو سلامة: "قانون الرقابة عندنا في مصر مطاطي جدا، والقانون ده بيخلي الموافقة أو المنع مبنية على عوامل كتير جدًا، ومن ضمن العوامل دي الذوق الشخصي للرقيب وتحليله للفيلم، فالموضوع محتاج إرادة سياسية واضحة جدًا، والمجتمع دائمًا هو القادر على فرض إرادته على المبدع وحماية نفسه، لأني لو عملت حاجة ضد المجتمع، هيتجنبني ومش هيتفرج على أعمالي".
واختتم عمرو سلامة حديثه، قائلًا إن هناك فجوة بين المبدعين والشعب المحافظ، الذي يرفض فكرة التحرر، مضيفًا: "في طول الوقت فجوة بين المبدعين والشعب اللي معظمه محافظ، ولما بيشوفنا بنتكلم عن حرية الإبداع، كل اللي بييجي في دماغه إن دي ناس منحلة عايزة تعمل عُري وعايزة تعمل أفكار تبوظ أخلاقنا، بس لا الهدف إن إحنا يبقى عندنا حرية إن إحنا نتكلم عن مشاكلنا الحقيقية وإننا نمثل الناس الحقيقية في العالم".
اقرأ أيضا: ماجد الكدواني رئيس عصابة ومحمد إمام مهدد.. الإعلان الرسمي لفيلم أبو نسب
