يسرا: متخيلتش في يوم أن عادل إمام يعتزل وحتة من قلبي اتخلعت
كشفت الفنانة يسرا عن سبب بكائها خلال حفل جوائز joy Awards بالمملكة العربية السعودية، موضحة أنها بكت لحظة تكريم الزعيم عادل إمام وإعلان اعتزاله الفن، كما تحدثت عن العلاقة القوية التي تربطها بالزعيم.
تصريحات يسرا
وقالت يسرا في تصريحات إذاعية: "متخيلتش في يوم إن عادل إمام أستاذنا الكبير ممكن يعتزل، لأنه عاش للفن، وعمري ما تصورت إنه يبعد عننا، تصورت يومها أنه معقول مش هيرجع لينا تاني بفنه؟ حتة من قلبي اتخلعت في اللحظة دي، وعلى فكرة حقه إنه يعوز يرتاح بس، أنا مش شايفاه بعيد ولا هيبعد عني أو عن جمهوره".
يسرا تتحدث عن علاقتها بعادل إمام
وأضافت يسرا: “عادل إمام عاش علشان حب الجمهور ده، والتكريم اتعمل له بصورة حلوة جدًا، وكلنا تأثرنا، وعمري ما حسيت إني زعيمة جمب الزعيم، اتعلم منه الزعامة ممكن، وعمري ما فكرت إني أكون زعيمة الفن”.
وأضافت يسرا: “ عمري ما هنسى لما أستاذ عصام إمام قالي من 20 سنة، هعملك مسرحية وهسميكي فيها الزعيمة، وقتها رفضت وقولتله لأ مفيش زعيم غير أستاذ عادل، و صعب أي حد يقارن نفسه بـ عادل إمام”.
واستكملت:" أنا و لبلبة دايمًا بنروح نزور عادل إمام، وأنا بفرح بقاعدتي معاه وبنقعد نتكلم على كل الشغل وبيضحك ويهزر ولذيذ وقاعدته دمها خفيف، هو راجل رائع بمعنى الكلمة".
وعن الكلمة التي قالها لها الزعيم عادل إمام ولم تنساها يسرا، فعلقت قائلة:" قالي أنتي بتتنطتي قدامي في كل السيناريوهات، بشوفك دايما في كل الأدوار، فأنا بقول أنك لازم تبقي معايا".
يسرا تكشف سبب رفضها لبعض الأعمال الفنية
وكشفت الفنانة يسرا، عن سبب رفضها عمل فني، قائلة:" برفض العمل الفني لما يكون مش هيضيف ليا ولمسيرتي وتاريخي ، كتير بقول الدور ده مش عاجبني، ومرات تانية بعتذر بشياكة شديدة جدًا من غير ما أقول أن الدور ده مش عاجبني".
اقرأ أيضاً:عصام السقا: الشغل مع خالد يوسف شرف ليا.. والعوضي عايز الكاست كله ينجح
