مخرج مسرحية المشهد الأخير: إصابتي بالبهاق شجعتنى أقدم العرض| خاص
عُرضت مسرحية "المشهد الأخير" على مسرح الطليعة، ضمن فعاليات المهرجان القومى للمسرح فى دورته الـ 16، الذى انطلق فعالياته 27 يوليو والذى سيستمر حتى 12 أغسطس، برئاسة الفنان محمد رياض.
وتقابل موقع "بالمصرى" مع مخرج العرض عمر أشرف، والذى كشف كواليس العمل وتحضيراته للعرض، قائلا: "الفكرة ليها علاقة بتشوهات الوجه، كمان أنا عندى بهاق من وأنا صغير، وده شجعنى على الفكرة أكتر، ولما عرضنا الفكرة على حنين البطلة اكتشفنا أن القضية بتمس كل واحد بشكل شخصى".
وتابع: "حاولنا نظهر نظرات الناس، وتريقتهم وسط الهزار، فممكن لو حد شاف العرض وكان بيعمل السلوك دا يقلل منه، إحنا عارفين أنه مش هيبطل بس يقلل على الأقل".
كما صرح لموقع بالمصرى سبب اختياره لنوع المسرح "مونودراما" بالأخص للعرض، قائلا: "الشخص اللى بيتعرض للمواقف دى بيكون لوحده مفيش حد بيشاركه المشاعر، والمونودراما بتقدر تعكس المعاناة دى والضغط النفسى والوحدة اللى بتوصلوا لكدا".
أما عن مشاركته فى المهرجان القومى، وعن رأيه فى دور المهرجان لرجوع المسرح، رد قائلًا: "أنا بقدم كل الشكر للمهرجان ومسرح الطليعة، لأنهم فعلا بيتعاونوا معانا جدًا كأنهم بيشاركوا فى الإخراج، من أول الإضاءة والصوت والتنظيم".
موضحًا: "المهرجان خطوة كبيرة ليا كأول تجربة إخراج، وخصوصا أن المهرجان كله نجوم كبار فدى حاجة مهمه جدًا ليا، وكمان المهرجان بيساعد بشكل كبير فى رجوع المسرح، فى وجود المسرحيات الكبيرة للنجوم، والتى تعرض فى مسارح الحكومة، وكمان مسارح الجامعة بتعمل شغل حلو جدًا".
كما تحدث عن تحضيره لأعمال أخرى، قائلا: "أنا حاليا بحضر حاجة أكبر شوية من المونودراما، بتكلم فيها عن معاناة الممثل، وبالأخص الممثل المسرحى ونظرة الناس ليه، وكمان علشان أنا شغفى أكتر للمسرح مش للميديا".
