أمير مرتضى منصور: عمري ما اشتغل في الأهلي.. ومثلي الأعلى من المنافس

أكد أمير مرتضى، المشرف السابق على الكرة بنادي الزمالك، أن مثله أعلى من أحد لاعبي النادي الأهلي، ويحث لاعبي الزمالك للوصول إلى هذا المستوى.

أمير مرتضى يكشف عن مثله الأعلى

وقال أمير مرتضى، خلال تصريحات تلفزيونية: «مفيش مشكلة أن مثلي الأعلى يكون النادي الأهلي، وأنا بكره فكرة إن علشان أبين إني زملكاوي أطلع أسف على الأهلي، واشتم فيه وأقل منه، أنا ماعنديش مشكلة أبقى متخانق مع حد من الأهلي خناقة كبيرة وطويلة، ولكن ده ملبيقللش من أن الأهلي نادي جامد والزمالك نادي جامد، وفي حاجات ناجحة في الأهلي بتستفزني وبتخليني عايز أعمل أفكار أحسن وأسبقها».

وتابع: «عندي ناس كتير جدًا في الأهلي كنت واخدهم مثل أعلى لناس في الزمالك وبقولهم عايزين نبقى زي دول، زي حسام غالي، كنت بقول لـ حازم إمام الصغير وطارق حامد عايزين نبقى زيه شوفوا شخصيته قوية واللاعيبة بتحبه وبتحترمه».

وأضاف: «الأهلي فيه نماذج ناجحة بحبها زي عماد متعب، ومحمد شوقي، وأبو تريكة، ماعنديش مشكلة لو شوفت حد من دول أقوله عايز أتصور معاك أنا بحبك، أنا زملكاوي ومتربي في الزملك وملبحبش حاجة في مصر في الكورة غير الزمالك، ولكن ده مش معناه إني شايف الأهلي معسكر العدو وناس من جنسية تانية».

واستكمل أمير مرتضى: «أنا عمري ما أروح النادي الأهلي، ولا هما هيفكروا في كده، وعضوية أبويا العاملة في النادي مالهاش علاقة، أنا ممكن أكون ساكن في المنطقة وده أقرب نادي ليا».