أحمد فؤاد سليم: يوسف شاهين قالي أنت مفضوح وعلمني درس مهم

تحدث الفنان أحمد فؤاد سليم اليوم أثناء ندوة تكريمه في دار الأوبرا المصرية عن تفاصيل في مشواره الفني على مدار السنوات السابقة، وصرح خلالها عن رأيه فيما وصل إليه الفن حاليًا في مصر.

وكشف عن رأيه في المسلسلات وإلى أي مدى يمكن أن تؤثر على المشاهد قائلًا: "بالتأكيد أن الفن شيء ضروري وكل المفكرين قالوا كده، وأحنا بنعرض مشاكلنا وقضايا المجتمع علشان نحلها، أنا في الحوار الوطني قلت إن المسلسلات حالة ضارة، لأن الناس بتتعلم منها الكسل، والعيل الصغير دلوقتي مش بيشيل الكوباية من مكانها لأنه عارف إن في حد غيره هيجي يشيلها، إيقاع الحياة اختلف جدًا، هل الفنانين دلوقتي عارفين الاختلاف اللي حصل ده؟ هل الفن بدأ يوضح خطورة هذه الأشياء؟ للأسف لأ".

أحمد فؤاد سليم عن يوسف شاهين 

كما تحدث الفنان أحمد فؤاد سليم عن موقف له مع المخرج الراحل يوسف شاهين وقال: "يوسف شاهين قالي في مرة أنت ممثل مفضوح وأى انفعال بسيط بيبان على وشك، وقالي إقرأ قراءة رشيدة وبتأني، التمثيل الكلاسيكي فيه نسبة من الانفعال، والناس بقت تصطنع أشياء وللأسف ده بسبب الفن، يعني مش لازم الصوت العالي ده يبقى بطولة، بالعكس ممكن البطولة تكون في قلبك مش لازم في ملامح وشك المفتعلة دي وده هيخلي المشاهد بعد شوية مش هيصدقك، اللي علمني الدرس ده يوسف شاهين".