أحمد عبد الوهاب: كنت قلقان في الحشاشين وكريم عبد العزيز عنده هيبة
تحدث الفنان الشاب أحمد عبد الوهاب عن كواليس مشاركته في مسلسل الحشاشين بطولة الفنان كريم عبد العزيز والذي عرض خلال شهر رمضان 2024.
تصريحات أحمد عبد الوهاب
قال أحمد عبد الوهاب في تصريحات تليفزيونية :"أنا مش بعرف أخلي حد يقول لي خد المشهد ده وصوره دلوقتي بحس إني محتاج أذاكر واتقمص الدور وأحضر ولما كلموني أعمل المسلسل ورغم أني من أول ما سمعت عن المسلسل من السنة اللي فاتت قلت يارب أعمل مشهدين في المسلسل ده كنت سامع عنه بس حسيت اني محتاج وقت اكتر".
وأضاف عبد الوهاب:" لما كلموني عشان أعمل أوديشن كنت متردد وقلقان، كلمت مراتي وقتها كانت في فرنسا قالت لي روح فورًا وحاولت أشرح لها قلقي ، واقنعتني أني أروح فورًا وبعد نزولي وأدائي للمشهد كلمتها وقولتلها أدائي كان وحش جدًا أكيد مش هاخد الدور وتفاجئت الفجر أن الناس بيكلموني وبيقولولي مبروك المخرج بيتر ميمي وافق عليك وقابلته وقعد يتكلم معايا ويشرح الشخصية".
مسلسل الحشاشين
واستكمل حديثه قائلاً:" يومها عرقت وأنا بتكلم وارتبكت وروحت قرأت الشخصية وكنت خايف وسألته بأي ثقة شايفني أعمل الدور ده؟ خاصة أن السنة اللي فاتت كنت عامل كوميدي وبكتب كوميدي، وكنت خايف أبوظ المسلسل لأني لو قدمت الدور وحش هجيبلهم نقد يومي لأن مشاهدي يومية".
التعاون مع كريم عبد العزيز
وعن عمله مع الفنان كريم عبد العزيز قال أحمد عبد الوهاب :" أنا متخضتش كدة طول حياتي إلا قدام الأستاذ كريم عبد العزيز لأنه عنده طلة وهيبة مع الشكل بالزي الأسود خلاني في أول مشهد نسيت الكلام وكان أول مشهد هو مشهد المناظرة لما قالي مش آن الأوان نفتح قلوبنا لبعض، وهو نجم كبير عارف يتعامل إزاي مع الممثل اللي قدامه وفاهم إحساسه".
اقرأ أيضاً:مع رجل المستحيل.. أحمد سعد يوجه رسالة للمستشار تركي آل الشيخ
