هالة صدقي تكشف سبب تغيير نهاية مسلسل أرابيسك
استرجعت الفنانة هالة صدقي ذكرياتها مع الفنان الراحل صلاح السعدني في مسلسل " ارابيسك" كما كشفت سبب تغير صناع العمل لنهاية المسلسل.
تصريحات هالة صدقي
قالت هالة صدقي في مداخلة هاتفية ببرنامج " أسرار النجوم" :" الفنان صلاح السعدني أكتر فنان أنا اشتغلت معاه في حياتي عاملين مع بعض تقريبا 14 مسلسل دا غير الإذاعة، كنا بنرتاح جدا في الشغل مع بعض كنت بفهمه من مجرد نظرة عينيه ببقى عارفة هو عايز إيه، من كتر ما طلعنا مع بعضؤ النهاية بتاعة مسلسل أرابيسك اتغيرت، لأن العرض في الوطن العربي كان سابق العرض في مصر، اتذاع في النسخة اللي اتعرضت في الوطن العربي إن "توحيدة" متجوزتوش، لكن في مصر عملنا مشهد إضافي إن "توحيدة" اتجوزت "حسن" من كتر ما كانوا الناس بتحبه".
نهاية مسلسل أرابيسك
وأضافت هالة صدقي:" في ذكريات كتيرة مع صلاح السعدني، أول حاجة عملتها معاه كان "الأب العازب" ودا كان تاني مسلسل ليا في حياتي، عملت معاه "أرابيسك" و"عمو عزيز" و"دمار شامل"، دا الممثل الوحيد اللي اشتغلت معاه كتير كدة من كتر ما الناس حبتنا مع بعض، وأنا اتعلمت منه كتير، اتعلمت صفاء النية ونضافة القلب، كان دايما بيشجعني على الشغل وإني أسيبها على ربنا وهو يكتبلي الخير".
اقرأ أيضاً:بسنت شوقي: محمد فراج متطرف في حب الأهلي وبتابع الكرة العالمية أكتر
