"عليا أقساط وعندي 35 شخص في رقبتي".. عصام صاصا يعود لنشاطه الفني بعد أزمته الأخيرة
أعلن مغني المهرجانات عصام صاصا عن استئناف نشاطه الفني مرة أخرى، وذلك بعد الأزمة التي تعرض لها مؤخرًا بسبب دهسه شخص على الطريق الدائري.
كتب عصام صاصا عبر حسابه على فيسبوك: “بسم الله الرحمن الرحيم.. ربنا وحده يعلم أنا بكتب الكلام ده وأنا عامل إزاى وفيا إيه.. أنا بقالي أكتر من شهر قاعد من غير شغل، ومعنديش أى حاجة أعملها غير إني قاعد وما باليد حيلة، ومستني قضاء ربنا سبحانه وتعالي ومحدش هيفهم أو هيحس بالموضوع غيري”.
وأضاف عصام صاصا: “أنا مطلعتش أتكلمت وعدت وزدت في الموضوع كتير، ومحدش شافني حتى بفيديو قولت أى كلمة خالص، لكن أنا عندي شغلي وعندي عقود التزامات لما أعملها وأخلصها يا إما هدخل في قصة تانية أنا مش قدها وشرط جزائي، أنا هنزل شغلي وهشتغل لإني مش بإيدي أي حاجة غير إني أعمل كده، أنا عندي أمي وعندي أخويا وعندي مراتي وابني وفرقه فيها أكتر من 35 شخص في رقبتي، أنا شاب لسة ببدأ حياتي ولسة بقول يا رب”.
عودة عصام صاصا لجمهوره بعد أزمته الأخيرة
وتابع: “مصاريف البيت والأقساط والحاجات دي كلها اللي إنتو متعرفوش عنها حاجة مين اللي هيدفعها أنا طالع أتكلم لإن ما باليد حيلة غير إنكم لازم تفهموا إن كل اللي بتسمعوه مش صح، الفلوس والقصور والعربيات كل ده مش صح، وحال الناس اللي شغالين معايا كل دول حالهم واقف بسببي، أنا كل دول ليهم بيوت وعيال ودنيا تانيه خالص”.
واختتم عصام صاصا حديثه قائلًا: “أنا عارف ومتأكد إن ربنا مش هيورينا الشر ومش هيوريني أى حاجة وحشة ده ابتلاء من عند ربنا سبحانه وتعالي وأنا راضي بكل حاجة ومش هقول غير الحمدلله على كل شيء والحمدلله واللي ربنا كاتبهولي هشوفه سواء خير أو شر محتاج من كل الناس اللي بتحبني تدعيلي من قلبها بجد أنا عمري ما كنت شخص مؤذي وعمري ما كنت شخص وحش مع حد ربنا كبير وحشتوني أوي يا أحلي جمهور في الدنيا”.
اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة
