شريف خير الله: جمال العدل حلف بلطلاق أني مشتغلش معاه

حل الفنان شريف خير الله أمس الأحد، ضيفا على برنامج "تفاصيل"، المذاع على قناة صدى البلد مع الإعلامية نهال طايل، حيث تحدث عن كواليس بعض أفلامه وبداية مشواره الفنى والحادث الذى تعرض له وفقدانه للذاكرة، كما كشف عن تفاصيل خلافه مع الفنان أحمد السقا والفنان الراحل نور الشريف.

أبرز تصريحات شريف خير الله

أنا كويس جدًا الحمد لله، ومبسوط لأن ربنا أكرمني السنتين اللي فاتوا بأعمال مميزة.

أهم هذه الأعمال مسلسل الإختيار، علشان كنت بشتغل فيه وشايف الحقائق.

شرف لي العمل مع مخرج متميز بحجم "بيتر ميمي".

بيتر اكتشاف بالنسبة لي في المسلسل، وبشوفه بيعمل حركات كاميرا غريبة مشفتهاش قبل كدة.

بيتر ميمي مخرج مبدع ودي تاني مرة أشتغل معاه، وكانت التجربة الأولى لينا فى كلبش.

قدمت كمان مسلسل (اللي خلف مامتش) وكان عمل مهم بالنسبة ليا.

كان مهم عشان بيناقش قضية الورث، وكان إخراج أحمد شفيق.

اتعرض عليا الأب الروحي الجزء الأول وكان عندي وقتها شوية مشاكل، وكمان كنت بقلق من شركات الإنتاج الجديدة.

كلمت محمود حميدة قالى أنه هيعمل 7حلقات بس فعتذرت لأنى افتكرت إنهم هيخلونى أعمل حلقة.

الدور راح للفنان أحمد عبد العزيز وهو أخويا، وكان تعبان الفتره دى فقولت يمكن ربنا رتب عشان يساعده.

وكنت مبسوط جدا بنجاح المسلسل.

أنا كنت شخص ميت وصحيت تاني، أنا موت بجد مش بهزار الحادثة دي مش فاكر منها ولا ثانية ولا بحاول أفتكر.

كنت فاقد الذاكرة لمدة 5 سنين ونزيف في المخ بتكلم مع الناس بس مش فاكر أي حد.

لحد النهاردة مش مستوعب الحادثة اللي حصلت.

اللي بيحصل في الساحة حاليًا ملوش علاقة بالموهبة أو أنك تكون صاحب نجاحات أو تاريخ.

قعدت مبشتغلش لمدة 3سنين، وبعت عفش بيتى عشان أقدر أصرف.

هو لازم أدخل فى شلة عشان أشتغل؟.

كل المخرجين دول من جيلى يعني لو في حد حب الفن يبقى بسبب شريف خير الله.

أنا واحد من الناس اللي مثلت كويس ونفسي أشتغل مع  محمد رمضان وأمير كرارة ومحمد سامى.

أمير كرارة مشروع نجم كبير، ومحمد رمضان ليه مستقبل باهر وهو عنده إصرار غير عادى.

ربنا اداني حاجات حلوة كتير وأنا مش واخد بالي منها، سامحني يارب ومتزعلش.

أنا طمعان في كرم ربنا وفضله ورحمته وأنت عندك الأجمل والأحلى وعارف اللى جوايا وإنك هتديني كتير.

كنت طالبا في المعهد وكان الأستاذ نور الشريف حضرعرض الأكاديمية.

وهو اللى رشحني لفليم الطيب والشرس والجميلة.

وقتها المخرج مدحت السباعي قالي هنعمل تعديلات في السيناريو وهبعتلك ومحدش بعتلي.

عرفت أن الفيلم بدأ تصويره فقولت خلاص يبقى حد أخد الدور.

بعدها بـ 10 ايام كلمني أستاذ عبدالرؤوف وقالي هتروح مدينة السينما علشان تصور.

قولتله أنى مخدتش السيناريو علشان أجي بس قالي هات بدلتين وتعالى.

وقتها أتعصبت وقولتله يعني ايه أجيب بدلتين وأجي هو أنا قاعد على الرصيف.

كنت فاكر أن نور الشريف ميعرفش اللى حصل فمروحتش.

عرفت بعدها أنه زعل منى لأنه كان مخبى الدورعن المخرج لحد مايجى الوقت المناسب ويبعتلى.

أحمد السقا كان بيعمل حاجات بتضايقنى وهو أصغر منى ب8سنين.

كلمته وقولتله لو عملت معاك حاجة زمان زعلتك منى حقك عليا.

هو نشيط وعنده طاقة كبيرة، أنا مختلف عنه وهو طيب وراجل يعتمد عليه.

نادية الجندي وإحنا بنصور فيلم عصرالقوة كانت بتنزل الساعة 7 ونص الجيم لحد9 وتصور من10.

هي بتحافظ جدا على جسمها وبتهتم بصحتها علشان كده هى بتصغر.

اتصحابنا أنا وهى بعد الفيلم، وكنا بنروح نحضرعروض سوا.

معرفش جابت الجماهيرية دى منين الناس كانت بتلف حوالين العربية علشان يشوفوها.

عبدالله غيث رشحنى لدور بعد فيلم عصرالقوة لكنى أعتذرت.

الدور كان بيتطلب ركوب خيل وأنا مش عندى المهارة دى فعتذرت.

جمال العدل كان قدملى عملين وأعتذرت عنهم، ولما جه مسلسل ريا وسكينة هو اللى رفضنى.

قال هو مفيش غير شريف خير الله هو مش عايز يشتغل، عليا الطلاق ماشغال معايا.

المخرج جمال عبد الحميد هو اللي رشحني للمسلسل لدور علي الصايغ فى ريا وسكينة.

لكن المخرج كان مصر على شريف خير الله وفعلًا صورت المسلسل.

ودورى فى المسلسل هو الشخصية الوحيدة اللي مش حقيقية.