باسم يوسف يدافع عن محمد صلاح: الكلام مش شغلة صلاح
علق الإعلامي الساخر باسم يوسف على الهجوم الذى يتعرض له اللاعب محمد صلاح، ومقارنتهما معا، وذلك بعد لقاء باسم يوسف فى أحد البرامج الأمريكية، ويليه فيديو محمد صلاح، الذى تحدث فيه عن غزة والشعب الفلسطيني.
ونشر باسم يوسف عبر صفحته الشخصية بموقع "فيسبوك"، صورة له مع محمد صلاح، قائلا: “أنا شوفت الصورة دي في كذا صفحة مع تعليق: ”محمد صلاح متصزر مع فخر العرب، ده غير بوستات تانية كتيرة جدا، ياما بتقارن لقائى مع الفيديو بتاعه، أو بتقلل وتهمش وتتريق على فيديو صلاح".
واستكمل باسم يوسف حديثه مدافعاً عن محمد صلاح، قائلا: "طيب في كذا نقطة -المفروض في العالم الطبيعي أن لعيب الكورة أو حتى الكوميديان يكونوا في الصفوف الاولى للدفاع عن القضايا الانسانية، ده دور الإعلام، والسبب أن اللي بيحصل غير كده إن الإعلام بيفشل في ده، بل وبيزيد الأمور سوءا فتتجه الناس للأشخاص الناجحين في مجالهم عشان يغطوا على فشل في مجال مش بتاعهم، و ده أول السكة في أننا بنظلمهم معانا، صلاح لعيب كورة..لا يتدخل في السياسة من أول يوم، واحتفاله بالكريسماس مش رسالة سياسية، الاحتفال بأي مناسبة ده نشاط إنساني بحت ولا يجب مقارنة صورة جنب شجرة كريسماس أو حلويات المولد بوضع علم او رمز للتضامن".
متابعا: "تعزيته في موت ملكة إنجلترا هو أيضا فعل إنساني وليس سياسي، صلاح أو أي لاعب كرة لو كان بيلعب في دوريات الخليج و لاقدر الله لو أمير أو ملك أو شيخ أو حاكم الدولة أو الأمارة أو المحافظة، اللي فريقه بيلعب له توفاه الله كان حيكتب تعزية برضة لأن ملكة إنجلترا عند الإنجليز اللي بيلعب عندهم مكانتها في قلوب ناس كتير جدا، زي مكانة هذا الملك أو الأمير في قلب شعبه، فده بروتوكول و ليس فعل سياسي".
باسم يوسف يدافع عن محمد صلاح
تابع باسم يوسف دفاعه عن محمد صلاح قائلا: "مقارنة فيديو صلاح باللقاء بتاعي هو ظلم بين، لأن الكلام مش شغلة صلاح ولأن طلاقة اللغة مش شغلة صلاح، لا صلاح حيعرف يتكلم و يحاور زيي و لا أنا اقدر العب كورة زي صلاح، يا جدعان ده أنا أكبر إنجازاتي الكروية إني عملت تلات عمليات غضروف و انا عندي ركبتين اتنين بس!!!!.... ده أنا خدت كباري بعدد شعر راسي و لو على اللغة، صلاح اللي ما دخلش مدارس لغات زيي بيتكلم إيطالي، أنا معرفش كلمتين إيطالي على بعض".
وتابع: "صلاح بالإنجليزي المكسر و الأداء “الفلات” أو المخطوف زي ما ناس وصفته، الأداء “الوحش” ده عمل ملايين التفاعلات و المشاهدات، كونه بقى أن :الكلام مايع ، مافيش ادانة واضحة، مسك العصاية من النص، قصف الجبهات مش دور صلاح خالص، واصلا هو فيديو غير موجه لينا، وفيديو بسيط من غير عياط و من غير نرفزة و من غير شتيمة و من غير ادانات و شجب و عياط و دموع، لكن يوصل برة و يغير صوت واحد ده ابرك بكتير".
وأضاف: "واحد زي صلاح، مُلهم لأجيال كتيرة قصة كفاح غير مسبوقة، راجل بيتبرع في السر أكتر من العلن، فاتح بيوت أنا و أنتم مش عارفين عددها، واحد زي ده نخسره ليه؟ عشان ما شفاش غليلك في قضية بقالها ييجي ميت سنة، اعتى الأنظمة و أكبر الدول فشلوا فيها؟ أتأخر؟، ياسيدي المهم انه وصل مش قوي بما فيه الكفاية؟ أه بالنسبة لك، لكن بالنسبة لناس كتيرة قوي قوي قوي دي ممكن يكون اللي مرة يسمعوا فيها عن القضية، الدنيا برة غير خالص الوطن العربي عندنا بس ده له بوست لوحده".
وتابع باسم يوسف قائلا: "فاكرين لما صلاح نزل صورته في القدس و كتب تضامن؟ اتشتم برضة، طيب لما يبقى عندنا واحد بوزن صلاح و كل شوية نشتمه عشان ماعملش اللي إحنا عشمانين فيه، طيب على الأقل لو ما شجعناش صلاح مش لازم ندوس عليه، صلاح مش المفروض يكون هو هدف لغضبك".
واختتم باسم يوسف حديثة قائلا: "أنا مريت بالفترة دي: ساكت ليه، ما تعمل زي فلان ما تقول زي علان؟ كل واحد و ظروفه و حساباته، لا يكلف الله نفسا إلا وسعها، كل واحد ادرى بالضغوط اللي عليه، بلاش نكون إحنا كمان سبب زيادة في الضغط عليه....في الآخر كل واحد و رأيه كل واحد يحب و يكره اللي هو عايزه، لو حبيت صلاح أو كرهته أنتت حر، البوست ده مش حيغير حاجة، ودي صورتي مع فخر العرب، محمد صلاح".
