يارا محسن "مهندسة الورد": "event planning" كشف مواهبي الفنية وبقيت صاحبة براند (حوار)
من مهندسة معمارية لـ Artist، هكذا انتقلت يارا محسن من مجال دراستها بالهندسة إلى المجال الذي وجدت به شغفها وحبها للألوان والورود، وهو الـ event planning والهدايا بالورد الصناعي.
وفي هذا السياق، أجرى موقع "بالمصري" حوار مع المهندسة والفنانة يارا محسن للتعرف أكثر على كيفية نجاحها في هذا المجال المختلف تمامًا عن دراستها.
وإلى نص الحوار:-
- ما هو مجال دراستك وما علاقته بالفن؟
أنا اتخرجت من كلية الهندسة جامعة عين شمس ومن أيام الجامعة كنت برسم وبدخل معارض الجامعة والمسرح ومثلت في مسرحية وخدت المركز الأول على مستوى العرض والمركز الثاني لمهرجان إبداع في الأقصر، ومكنش هدفي أجخل الوسط الفني ولكنها كانت مجرد هواية وما زالت الإذاعة شغفي حتى الآن.
- كيف بدأت مشروع الـ event planning؟
قبل التخرج كانت خطوبة صحبتي وطلبت مني أساعدها في ديكور الخطوبة، وعملتلها حاجات كتير عجبتها وحسيت إني شاطرة وحبيت المجال، ومن هنا بدأت وكنت بعمل كل الشغل والتصميمات بإيدي لإني عايزة أقدم حاجة جديدة.
- ما أهم ما يميزك في هذا المجال؟
اللي بيميزني إني بعم التصميمات بنفسي مش باخدها زى ما هى وأنفذها وده كان حلو لإن كل مرة الشغل بيكون مختلف، وكنت بنزل Events وبلاحظ زحمة الناس وكان بيعجبهم التصميمات بتاعتي، وأنا كمان بحب الألوان والحاجات اللي بتدي طاقة إيجابية، وبعد كده عملت الصفحة بتاعتي وبراند صغير ليا.
- من أين جاءت فكرة الهدايا بالورد الصناعي؟
لما الموضوع اتطور شوية كنت نازلة Event وكنا وقت الفلانتين وكنت عايزة أقدم حاجة جديدة وبدأت اشتغل بالورد الصناعي وفكرته إنها هدية قيمة وبتعيش طول الوقت، لإن الورد الطبيعي بيموت ومش طبيعي أدفع مبلغ كبير في ورد طبيعي ويموت في حين إن الورد الصناعي هيفضل موجود وشكله زى الطبيعي بالظبط وليه رائحة، وتعتبر دي أكتر حاجة اتعرفت بيها، وبعدها عملت لقاءات كتير في برامج مختلفة.
- كبرتي البراند بتاعك ازاى؟
بعد الفلانتين اتفقت أنا وصحبتي إننا نكون شركاء ونشتغل مع بعض، وطبيعي أى شخص بيحب يحس إن فيه داعم في حياته سواء ماديًا كشريك في العمل أو مجرد التشجيع من ورا الكواليس، وكمان بعد كده دخلت في مجال الإعلانات وحبيت إني أعمل ديكور يتصور فيه براند مهم.
- هل تركتي مجال الهندسة من أجل شغفك؟
أنا لسه بشتغل مهندسة معمارية، لإن الـ Events كانت هواية ومش مركزة فيه مليون في الميه، وكنت دايمًا بعافر الحاجتين مع بعض لإني مش جريئة كفاية إني أسيب شغلي وأركز، مع إن في ناس كتير ضدي وكانوا بيقولوا إني أخد الموضوع هواية بس مينفعش يكون مهنتي الأساسية.
- استغليتي حبك للتمثيل والإذاعة في مشروعك؟
استغليت حبي للإذاعة إني بقيت أعمل فيديوهات على السوشيال ميديا اتكلم فيها مع الناس بس مقدرتش استمر لإني مش بحب السوشيال ميديا قوي، بحب أنزل صور شغلي وكده لكن مقدرش أمسك الموبايل طول الوقت ويمكن هو ده السبب إني مش مشهورة قوي على السوشيال ميديا لحد دلوقتي، وكمان الموضوع بالنسبالي مش بيزنس على قد ما هى حاجة بحبها وشبه شخصيتي.
- هل لديك هوايات آخرى؟
طول عمري كنت بلعب رياضة وسباحة، وبحب الفن بكل أنواعه وكل حاجة ليها علاقة بالسعادة، وكل الناس بتقول إني بديهم طاقة إيجابية، ومروري بأزمة صحية في حياتي مش بحب أتكلم فيها هو السبب إني بقيت عايزة أعمل حاجة في حياتي.
- من هو مثلك الأعلى؟
إسعاد يونس هى مثلي الأعلي، لإنها لما قدمت برنامج صاحبة السعادة كانت بتنشر السعادة فعلًا وعجبتني قوي فكرة البرنامج بتاعها، ونفسي جدًا أكون معاها في يوم من الأيام.
