طارق الشناوي: "بيومي فؤاد حاسس إن الضحك جريمة ومصطفى قمر كذاب"
حل الناقد طارق الشناوي ضيفًا على الإعلامية أسما إبراهيم في برنامج "حبر سري" وتحدث عن أزمته مع الفنان مصطفى قمر، كما كشف عن الحالة الصحية للزعيم عادل إمام، والعديد من الأمور الأخرى.
قال طارق الشناوي عن أزمته مع مصطفى قمر: "لو أنا حاسس إني مش محايد مش هكتب لكن غير كدة بقول رأيي، أصعب حاجة لما تتجاهل عمل فني سلبي وكأن شيئا لم يكن دي اصعب حاجة".
طارق الشناوي يكشف تفاصيل أزمته مع مصطفى قمر
أما عن مصطفى قمر، قال: "مصطفى قمر لو عمل فيلم أو أغنية كويسة هكتب عنه، ومش هتكلم عن الكلام اللي قاله عليا أمام القضاء لانه تجاوز في حقي، وهو بيقول إني مرة روحتله المكتب ومعايا بنت عايزها تشتغل ممثلة ورفض والكلام دة قاله من سنتين وبعد كدة نسي هو قال ايه وقال مرة تانية اني روحتله البيت ودة محصلش أنا عمري ما قابلته هو كذاب".
وتابع: "هو قال إني مشوفتش الفيلم وكلهم صدقوه وقالوا كدة لأن أنا مبحضرش عروض خاصة، لكن أنا السينما جمب بيتي وبتفرج على الفيلم مع الجمهور العادي، وانا في السنوات الأخيرة بطلت اروح عروض خاصة ودة اللي خلاه يقول اني مشفتش الفيلم، أنا بنقد نقد لاذع ودة جزء من اسلوب التناول".
طارق الشناوي يكشف عن رأيه في أزمة بيومي فؤاد
وتطرق الناقد طارق الشناوي بالحديث عن أزمة الفنان بيومي فؤاد، قائلًا: "اللحظة اللي احنا فيها ساعات بتخلي الكلمة اللي ممكن في وقت تبقى عادية تصبح غير عادية، أنا لو من بيومي همثل العرض واضحك الناس ومش هعتبر الضحك حاجة بنفيها عن نفسي لأن الضحك شيء عظيم واغلب المضحكون بيبقوا اذكياء جدا".
وتابع: "بس بيومي عنده احساس أن الضحك جريمة في هذا الوقت فهو اخطأ في حق الضحك وحق الكوميديا اللي بيعملها وجزء كبير من أعمالنا الكوميدية هي الضحك للضحك على عكس ما ناس كتير بتقول أن في هدف ويقول أنا عايز هدف طيب ما هو الضحك هدف".
طارق الشناوي عن عمرو دياب
كما تحدث عن الفنان عمرو دياب، وقال: "عمرو دياب هو أذكى فنان ظل في القمة بعد وجود محمد عبد الوهاب وعبد الحليم حافظ، وذكاءه عندما يختار كلمات الأغاني فهو لا يختار كلمات بعيدة عن الناس، بل يختار كلماته بنفسه، من قلب الشارع ويقدمه بأسلوب فني".
طارق الشناوي يكشف عن الحالة الصحية للزعيم
كما طمأن طارق الشناوي الجمهور عن الحالة الصحية للزعيم عادل إمام، قائلًا: "هو أيقونة الفن المصري ومدرسة خاصة في التاريخ الفني لدى مصر والعالم العربي، وعصام شقيق عادل إمام الأصغر بيطمني عليه ولو كتبت حاجة عنه يقولي عادل قرأ الموضوع ومبسوط وأتمنى يعود للعمل الفني من جديد"، مؤكدا أنه أكثر ناقد وجه نقدا لعادل إمام في أعماله الفنية.
اقرأ أيضًا: طارق الشناوي يعترض على قرار هند صبري بالاستقالة من برنامج الأغذية العالمي: "المقاومة الحل وليست الاستقالة"
