محمد رضوان يكشف سر ترشيحه لدور حالقوم في يوميات ونيس

كشف الفنان محمد رضوان خلال حلوله ضيفا ببرنامج صاحبة السعادة، مع إسعاد يونس، عن كواليس وتفاصيل ترشيحه للمشاركة في مسلسل يوميات ونيس، مع الفنان محمد صبحي.

وقال محمد رضوان: “كنا في المرحلة اللي الأستاذ محمد صبحي، والأستاذ لينين الرملي، مكنوش على وفاق مع بعض، وهو كان بيعمل مسرحية ماما أمريكا، في مسرح قصر النيل، وأنا معدي بالصدفة فلقيت زمايلنا بتوع الديكور وقالولي خش سلم على الأستاذ محمد صبحي”.

وأضاف: "دخلت فعلا فلما قابلته، قالي انت بتعمل إيه دلوقتي، فقلتله أنا في المسرح القومي حاليا، بس مش بشتغل قالي طيب أنا عايزك علشان هعمل مهرجان المسرح للجميع".

وتابع: “بعد اسبوع لقيته باعتلي دور حلقوم في مسلسل يوميات ونيس، الجزء الخامس، وهو شخص عايز يتجوز واحدة من إخوات زكريا، وهو المفروض موظف وبيقبض 150 جنيها في الشهر، ومش قادر يتجوز، بس عايز يتجوز ويعيش حياته”.

وواصل: "وهو المفروض شخص سلبي شوية، ومش بيحب لا المزيكا ولا الشربات، وكل ما تقوله حاجة يقولها همشي، والشخصية كانت واخدة الكوميديا من الصرامة، وفضلت الشخصية لغاية آخر الأجزاء".

اقرأ أيضا:ميشرفنيش أكون زميلة لك.. كاملة أبو ذكرى تهاجم بيومي فؤاد