غادة عبد الرازق: "البرامج استغلت صراحتي بسبب الترند وبيخوفوا مني المخرجين"

كشفت الفنانة غادة عبد الرازق عن حرصها خلال الفترة الحالية على انتقاء ردها أثناء لقاءاتها التليفزيونية، موضحة أنهم استغلوا صراحتها بسبب رغبتهم في تصدر الترند.

قالت غادة عبد الرازق، في تصريحات إذاعية: “أغلب البرامج استغلت صراحتي وأنا للأسف ماكنتش واخدة بالي، لأن هو في مصلحته يجيب غادة عبد الرازق ويطلع بيها ترند وأنا صريحة ومتسرعة في الرد وأتأذيت من ده، ودلوقتي بقيت باخد بالي لو روحت برنامج أي سؤال ميعجبنيش على الهواء بوقفه عند حده وبقول ده عدم احترافية”.

وأضافت غادة عبد الرازق: “الفانز بتوعي دمهم شربات ومعايا بقالهم سنين، أنا عندي ناس من 22 سنة وحافظين غادة عبد الرازق، وأنا اللي في قلبي على لساني، بس الحمد لله بقيت ماسكة لساني دلوقتي”.

غادة عبد الرازق تكشف سبب غيابها عن الساحة الفنية

أما عن فترة غيابها عن الساحة الفنية، قالت غادة عبد الرازق: “شغلانتنا من زمان جدًا لما تلاقي حد ناجح أوي ومش عايز نجاحه يكمل، هو بينجح بالعناصر اللي حواليه مش لوحده، أنا مع مخرج وكاتب وكاست وحدوتة أنجح، فكانوا بيطلعوا عليا سمعة علشان يخوفوا مني المنتجين والمخرجين، وبيعملوا نفس الحكاية مع الممثلين إني بتدخل، الأعمال اللي اشتغلتها أثبتت إن اللي بيقولوه مش حقيقة، لغاية ما مصر كلها عرفت إن ده مش حقيقة، لكنه خد وقت وتعبني نفسيًا”.

غادة عبد الرازق: 2023 كانت حلوة وخدت فيها خطوات كويسة

أما عن واقع سنة 2023 عليها، ردت قائلة: “2023 كانت سنة حلوة أخدت فيها خطوات كويسة على الصعيد المهني والشخصي، وكنت سعيدة بـ تلت التلاتة وحدث بالفعل، وإني عملت فيلم هو لسة منزلش ولكن رجعت من خلاله للكوميدي، وعلى المستوى الشخصي عنيا فتحت على حاجات كتير أن أحفادي كبروا، فبقيت حاسة إن في أشخاص كبار موجودين معايا وبياخدوا ويدوا معايا في الكلام مكنتش واخدة بالي، إدتهم وقت من حياتي هما وبنتي روتانا وعملت حاجات عمري ما كنت أتخيل إني أعملها في الفاشون”.

اقرأ أيضًا: طه دسوقي يعاني من حالة نفسية وغادة عادل محامية.. ملاحظات على إعلان مسلسل حالة خاصة