باسم يوسف عن مساعدته لـ عماد أديب: "عملت اللي بيعمله أي حد"

رد الإعلامي باسم يوسف على إشادة الإعلامي عمرو أديب الأخيرة بأدائه ومساعدته لشقيقه الإعلامي عماد أديب، كما أشار إلى أنه لم يقم بإسعافات أولية كما ذكر عمرو أديب.

قال باسم يوسف خلال لقائه مع برنامج et بالعربي: “أنا مأنقذتش حياة حد، وعماد أديب في صحة كويسة بسبب إن رد فعل السلطات الطبية في دبي كانت سريعة، أنا معملتش أي حاجة، وأنا عملت اللي بيعمله أي واحد في أولى طب وكنت جنبه بقيسله النبض وطلبت من الناس نجيبله دكتور”.

باسم يوسف يرد على تصريحات عمرو أديب

وتابع باسم يوسف: “معملتش أي حاجة خالص ولا أسعفته ولا عملت أى إسعافات، أنا كنت موجود وأي واحد تاني كان هيعمل كده وحمد لله على سلامته، بس أنا يعني معملتش كل الحاجات ديه”.

تفاصيل مساعدة باسم يوسف لـ عماد الدين أديب

وسبق وكشف الإعلامي عمرو أديب خلال برنامجه الحكاية على شاشة قناة mbc مصر تفاصيل مساعدة باسم يوسف في إنقاذ شقيقه الإعلامي عماد أديب، وقال: “عايز أشكر ناس مهمة في الحقيقة لسبب شخصي، من يومين تلاتة أخي الكبير عماد الدين أديب كان في المؤتمر الاستراتيجي في دبي، وكان بيدير جلسة وكان بيسأل إنه ممكن تجيله أزمة قلبية لو معرفش الإجابة، وكان فيه مسئولين سعوديين وإماراتيين وجاوبوا على السؤال وبعد 4 دقائق من الجملة ديه جاتله شبه أزمة قلبية”.

وأضاف: “عايز أقول إن أولًا أشيد بهذه الدولة المحترمة اللي كان فيها عربية إسعاف مجهزة للحالات الطارئة وتم نقله للمستشفى في ظرف 7 دقائق ولولا جاهزية الإسعاف ما كان موجود، ومدير المستشفى بنفسه قام بعمل إنعاش لقلب عماد اللي توقف لمدة دقيقة كاملة وطبعًا كان فيه شريان اتقفل بنسبة 100%”.

واختتم عمرو أديب حديثه: “وعايز أشكر الدكتور باسم يوسف اللي هو باسم يوسف اللي نعرفه، لأنه قام على الفور بقياس النبض والتدليك وقال إنه على طول لازم يتنقل، وجدعنة المصريين، وعلاقتي بباسم يوسف مش تمام، ولكن أكن لباسم يوسف كل الاحترام على اللي عمله، وهشيل ده، وهو ليه دين في رقبتي.. والجدعنة والشهامة لا تقدر بثمن”.

اقرأ أيضا: بعد النجاح الساحق لموسمه الأول.. طرح برومو الجزء الثاني من مسلسل وبينا ميعاد