فاطمة كشري: “كانوا بيطردوني من اللوكيشن وأحمد مكي بيساعدني لحد دلوقتي”

كشفت الفنانة فاطمة كشري، عن تفاصيل خضوعها لعملية جراحية في الفترة الماضية، وعلاجها على نفقة الدولة، إلى جانب الحديث عن مساعدة الفنان أحمد مكي وأحمد السقا، لها حتى الآن.

قالت فاطمة كشري، خلال لقائها مع الإعلامية إنجي هشام، في برنامج المنسي: “كنت جدعة مع صحابي ومكنتش بشتغل كانوا بيطردوني علشانهم، ولكن اللي عملته خير نفعني دلوقتي، وزمان كانوا بيدونا بدل مواصلات و2 جنيه بدل وجبة، كنت أقولهم إيه دول طيب خلوها 5 جنيه، قالي إنتي مش معايا بكرا، وسبحان الله ربنا خلاني راكور وهو اللي يدور عليا”.

فاطمة كشري: اتعالجت على نفقة الدولة

وأضافت فاطمة كشري: “يوم ما عملت العملية ربنا استجاب مني وسيادة الرئيس وداني المستشفى واتعالجت على نفقة الدولة، وفي كمان فنانيين بيساعدوني لغاية دلوقتي زي أستاذ أحمد مكي، وأحمد السقا، وأنا كنت متجهة للفن بس، ولكن بعد وفاة جوزي بقيت بقعد ورا ابني على عربية الكشري، اللي مبتشتغلش وتطلع تقول عايزة اشتغل إن سألتي فسألي الله، وإن استعانتي فاستعيني بالله، لو إنتي في قمم ومستخبي رزقك هيجيلك، أنا كنت باخد ملاليم وربنا نعم عليا بالملايين”.

أما عن قلة أعمالها في الفترة الماضية، تابعت فاطمة كشري حديثها قائلة: “أنا جالي مسلسل 1000 حمد الله على السلامة مع الفنانة يسرا، اشتغلت فيه يومين وريحت ومجاليش شغل تاني، هرقع بالصوت وأقول عايزة شغل؟ في جنبي عربية كشري بتأكلني الحمد لله، وبيجيلي ناس يقوليلي قولي لينا كلمتين ونعمل حركات وناخد فلوس وأنا مبرضاش أعمل الحاجات دي، هنزل المكاتب وأروح وأطلب، ما طول ما إنتي مستخبية مش هيجيلك شغل، والممثل طول ما هو قاعد يقولك إدعي لينا يجيلنا شغل ولما يجيلهم بينسوا، والمنتج والمخرج في المكاتب لما بيرشحوا حد بيرشحوا اللي موجود قدامهم في المكتب”.

اقرأ أيضًا: عمر طاهر: حبيبي الأولاني أول أغنية اكتبها والڤيديو بيوصل المعاني للجمهور أفضل