بوسي: "عمري ما قصرت مع أبويا وسعد الصغير خد شقا مرات أخوه ومستبعدش عليه حاجة"

ردت المطربة بوسي، على تصريحات المطرب سعد الصغير، حول مساعدته لوالدها الراحل، وأعربت عن استيائها الشديد بسبب كلامه وطلبت منه عدم الحديث عنها مرة أخرى.

قالت بوسي في تصريحات تلفزيونية: “أول مرة أشوف راجل كده، وأنا متقارنش بيه ومعرفش اللي بيعمله ده غيرة ولا إيه، وهو عايز مني إيه ولا ده لمصلحة مين ولا بتعمل أي بروباجاندا علشان الناس تاخد بالها منك، ليه ما بتصدق أي حد يقول حاجة تقوم فارش الملاية؟”.

وأضافت بوسي: “هو أنا مستنية حد يعمل اللي قال عليه ده لأبويا؟ هو لما حد يجيبلي انتريه ولا ثلاجة ولا بوتاجاز بـ 50 ولا 60 ألف جنيه مش هعرف أعمل ده؟ أنا ياما عملت كتير وإخواتي عارفين، وأخويا اللي جاب أبويا يقعده في شقة أمي لأنه مبيدفعش الإيجار، وأنا عمري ما قصرت مع أبويا”.

بوسي: أبويا كان طماع وكانوا بيستغلوه ضدي

وتابعت بوسي: “كانوا بستغلوا أبويا ضدي، وبيروحوا يدوا له فلوس ويخلوه يتكلم علشان يحاربوني بيه، وهو كان طماع وعايز فلوس، وكان بيقولي أخوكي مبيوصليش الفلوس، هو في أكتر من أنه أكون لسه بعتاله فلوس ألاقيه تاني يوم يطلع يقول أني مبردش عليه ورامياه؟ إمتى رميته؟، وأنا منعت عنه الفلوس وقتها لأني معملتش فيه حاجة وحشة، وهو اللي عمل”.

واختتمت حديثها قائلة: “سعد الصغير قالي أنا هروح أصور مع أبوكي، قولتله بعد إذنك متدخلش نفسك في حاجة زي دي، قالي لأ ده أنا هصالحكم قولتله مين قالك أننا زعلانين؟ وكان عايز يركب التريند على قفايا، وممكن يكون حد زقه عليا، وأنا مستبعدش عن سعد أي حاجة، اللي ياخد شقة مرات أخوه المتوفى وياخد شقاها ودهبها ويديه لواحدة تاني مكنتش على ذمته وقتها”.

اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة