"شوية وهتفهموا".. أول تعليق من بيتر ميمي على انتقادات مسلسل الحشاشين
خرج المخرج بيتر ميمي عن صمته، ورد على الانتقادات التي نالت مسلسل " الحشاشين" بطولة الفنان كريم عبد العزيز والذي يعرض حالياً خلال دراما رمضان 2024.
رد بيتر ميمي على منتقدي مسلسل الحشاشين
كتب المخرج بيتر ميمي عبر حسابه بموقع التواصل الاجتماعي فيسبوك،: '" مبدأيا المسلسل من وحي التاريخ وده مكتوب نصًا فى التترات يعني مش وثيقة تاريخية لكنه دراما تاريخية".
وتابع: “ هو تارنتينو لما قتل هتلر فى السينما كان حقيقة أو نابليون فى فيلم ريدلى سكوت الأخير هل ده نابليون اللى فى كتب التاريخ، ديه دراما تاريخية”.
وأضاف: “ حاولنا نعمل خيال تصويرى لفترة من الفترات لكن فى شكل درامي يتناسب مع الدراما، لكن رجعنا فى الديكور والملابس لمراجع كتيرة ونادرة عشان نعمل عالم مشوفنهوش قبل كده وميكنش شبه أفلام أو مسلسلات عالمية شوفناها قبل كده”.
واستكمل المخرج بيتر ميمي حديثه، وقال: “ هل ده حسن الصباح، مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد، ماركو بولو أو فلادمير بارتول أو برنارد لويس أو فرهاد دفترى، وكتير جدا، حسن الصباح كان بيعمل معجزات، لا طبعا وده تباعًا مع الحلقات هيتفهم”.
بيتر ميمي يتحدث عن مسلسل الحشاشين
وواصل كلامه على مسلسله الجديد المعروض في موسم مسلسلات رمضان 2024، وقال: “الحشاشين مسلسل تاريخي بالعامية المصرية، الأحداث بين أتراك وفرس، لما عملوه الأتراك اتكلموا تركي ولما عملوه الأمريكان بيتكلموا إنجليزى، احنا عاملينه فى مصر والترجمة موجودة فى كل بلد، المسلسل بيتعرض فى روسيا وأمريكا وأكتر من بلد كل بلد بلغتها، هم الڤيكنجز كانوا بيتكلموا انجليزى، ولا ويليام والاس كان بيتكلم اللكنة الأمريكية؟".
شخصية حسن الصباح في مسلسل الحشاشين
أما عن شخصية حسن الصباح، قال المخرج بيتر ميمي: “ليه حسن الصباح، حسن الصباح شخصية فذة وغريبة ومستفزة أنك تعرف عنها، مش لازم يكون رمز للخير علشان يتعمله مسلسل، هتلر وراسبوتين كانوا فى منتهى الشر لكنهم شخصيات فذة غيرت تاريخ العالم.. أو على مستوانا المصرى خط الصعيد أو سفاح إسكندرية”.
وأردف: "أم الخليفة رصد كانت نوبية الأصل، وإسكندرية مدينة فى مصر، لأن فى مدن كتير باسم إسكندرية حوالين العالم، لزم التوضيح للترجمة لأن فيه غير مصريين بيتفرجوا على المسلسل ومجاعة القاهرة الفاطمية مثبوتة تاريخيا، لكن تعددت أشكالها حسب المصادر، وهى على فكرة كانت قبل وصول حسن بفترة مش بعيدة بس ديه دراما (من وحي التاريخ)، ماتسمى بمعجزات حسن الصباح مقصود تتصور بالشكل ده.. وده هيبان تباعا وخصوصا مشهد الراوي حلقة 8، عم ملك شاه اتقتل بوتر القوس لأن ده كان عرف وتقليد، مين الست اللى بتظهر لحسن الصباح؟ ده فى حلقة 30 بقى لو ربنا ادانا عمر'.
واختتم بيتر ميمي: 'كل سنة وأنتم طيبين وسعيد أن المسلسل خلاكم تقروا وتسألوا.. و شوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللى احنا عاملينه.. ومع الوقت ننافس".
اقرأ أيضاً:مع رجل المستحيل.. أحمد سعد يوجه رسالة للمستشار تركي آل الشيخ
