سمية الخشاب تقاضي رامز جلال بسبب «رامز جاب من الآخر»..ما القصة؟!
هاجمت الفنانة سمية الخشاب الفنان رامز جلال بسبب برنامجه برنامج "رامز جاب من الآخر" الذي يذاع يوميا خلال شهر رمضان، مشيرة إلى الإصابات التي عانت منها بعد حلولها ضيفة به، وتحدثت عن الإجراءات القانونية التي اتخذتها ضده.
تصريحات سمية الخشاب
وقالت سمية الخشاب خلال حلولها ضيفة ببرنامج " تفاعلكم" :"هما قصوا كتير جدا من الحلقة وأنا بقول رجلي بتوجعني وكتفي وجعني، ولحظة وقعتي كانت وقعة قوية بس هو قص كتير عشان ميبانش إن أنا اتصابت، وأنا عندي تمزق في الأربطة في رجلي وفي كتفي ومش بعرف أحرك إيدي بارتياح".
وأضافت سمية الخشاب: “اللي يزعل إن ولا حد منهم كجهة إنتاجية اتصل بالناس وقال سلامتكم أو اعتذر، هو احنا في غابة يا جماعة؟ مش مهم الناس يحصلها ايه المهم أطلع أنور وأعمل مشاهدات عالية؟ المهم مصلحتي والباقي يتحرق؟ ايه اللي بيحصل دة دة مهزلة لا يمكن السكوت عليها، الناس تتأذي في صحتها”.
وتابعت: "ما أنا عملتها معاه 4 سنين قبل كدة بس كنت عارفة إيه اللي بيحصل لكن المرة دي متقالش، عشان في تعمد للأذية يبقى انت كدة متعمد تأذي الناس، دي جريمة يعاقب عليها القانون، وقالي إنه برنامج عادي فورمات".
برنامج رامز جاب من الآخر
وأوضحت سمية أن هناك العديد من الضيوف المصابين في البرنامج، وقالت: "متأكدة ان في تعمد في الأذية والدليل إن مفيش حد اهتم إنني اتصابت، ولما رحت للمستشفى قالولي انتي مش أول حالة، امبارح جالنا 3 حالات من عند رامز، أقل حد اتصاب حصله كدمات متعددة في جسمه، معقول انتوا عارفين بتكسروا في الناس كل يوم ومكملين تصوير؟ وقال أصل الناس ماضية على إنهم موافقين على جميع الملابسات والظروف الخاصة بالبرنامج، يعني ايه؟ أنا موافقة إنني اتكسر؟ أصلا مفيش عقد بينا بس لو حتى فيه عقد، جسمنا دة مش ملكنا، دة ملك ربنا، فمش من حقك تؤذي جسمي صحيا ونفسيا وعصبيا، فده ضد حقوق الإنسان وضد القانون".
سمية الخشاب تتخذ إجراءات قانونية ضد رامز جلال
وأنهت سمية الخشاب حديثها قائلة: "أنا رفعت قضية فعلا ومن تاني يوم وأنا عاملة إجراء وفي طلب للنائب العام إن ينظر للموضوع، أنا متأكدة إن في ناس اتصابت ومش عايزين يقولوا عشان خايفين MBC تزعل منهم بس هي قناة محترمة وهي بتعرض البرنامج ومش الجهة المنتجة له. أنا يعني صحتي دي محدش هيزعل عليها؟ كله إلا الأذية".
اقرأ أيضاً:بسنت شوقي: محمد فراج متطرف في حب الأهلي وبتابع الكرة العالمية أكتر
