ماجد الكدواني يكشف تفاصيل خضوعه للعلاج النفسي بسبب تراب الماس
كشف الفنان ماجد الكدواني، تفاصيل خضوعه لعلاج نفسي بسبب شخصيته في فيلم تراب الماس، موضحًا أن نجله وزوجته طلبوا منه زيارة الطبيب النفسي بعد تغير سلوكه.
تصريحات ماجد الكدواني
قال ماجد الكدواني خلال حلوله ضيفاً ببودكاست بيج تايم الذي يقدمه الإعلامي عمرو أديب:"أنا وكريم عبد العزيز كنا بنتريق على الممثلين اللي بيقولوا أنا عايش بالشخصية، وبالصدفة اكتشفت أني متأثر بشخصيتي في تراب الماس بشكل كبير، لأنها كانت مستفزة وعميقة، ومراتي وابني ومروان حامد قالولي روح لدكتور نفسي مش عيب، وروحت فعلًا".
وأضاف الكدواني: "أنا حبيت الشخصية لأنها بتغذي حاجات بترضي الإنسان، ومروان حامد قال شخصية وليد سلطان دي المتعة المحرمة، لأن كل إنسان فينا عايز يعمل كل اللي نفسه فيه من غير جلد ذات وتأنيب ضمير وخوف من عقاب ولا لوم ولا قيم، كل إنسان عايز يعمل اللي نفسه فيه المتعة المحرمة".
وأضاف الكدواني:" أنا كنت واصل لمراحل غضب شنيع، وبشوط حاجات برجلي، في طاقة غريبة عندي ، والدكتور قالي الشخصية أنت حبيتها ولكن هي موجودة في العقل الباطن، وأي شخصية أنا همثلها أو اتفرجت عليها ولمثتني ودخلت قلبي بتفضل في العقل الباطن، وخدت كورس لطيف وبدأت أهدى من غير أدوية خالص".
تأثير فيلم تراب الماس على ماجد الكدواني
وواصل ماجد الكدواني: “بعدها بفترة حصل موقف غضبت غضب انفجاري، بسبب أن حاجة ضاعت مني ومش لاقيها، وكان غضب هستيري وبشوط الحاجات برجلي، مراتي قالتلي كلم الدكتور أسأله إيه اللي بيحصل، قالي مش إحنا قولنا أن الشخصية موجودة في العقل الباطن؟ طمنهم في البيت وقولهم أنا عندي وليد سلطان ساعة يروح وساعة يجي”.
اقرأ أيضاً:جمال العدل يطرح محتوى خاص بذوي الهمم في بودكاست في رمضان
