أحمد زاهر يوجه رسائل لبناته ويؤكد: "عاملهم خطوط حمراء في الفن"
كشف الفنان أحمد زاهر عن العديد من التفاصيل الشخصية حول بناته خاصة ليلى وملك، مؤكدًا أنه وضع لهما خطوط حمراء في الفن.
قال الفنان أحمد زاهر خلال لقائه في برنامج "كلام نواعم" عبر قناة mbc1: "قايل لبناتي على خطوط حمراء في التمثيل أنا شخصيًا عمري ما عملتها وهما من غير ما أنا أقولهم لما بيلاقوا دور جايلهم فيه حاجة غلط بيعتذروا، وأنا مش بحب الأدوار الخادشة للحياء، وشايف إن ملهاش معنى قلت لهم أنا شخصيًا أهو راجل عمري ما عملت الحاجات دي فأكيد هما مش هيعملوها وأنا لو مش موجود لو ميت هما هيرفضوا الحاجات دي ومجتمعاتنا الشرقية بقت بتنفر من الحاجات دي".
تصريحات أحمد زاهر عن بناته
كما حرص أحمد زاهر على توجيه رسالة لبناته، وبدأ بابنته ليلى، وقال: "أنا فخور بيكي لإنها فاجئتني في مسلسل أعلى نسبة مشاهدة وأنا مقعدتش معاها في أى مشهد لإني كنت بصور، انبهرت بأدائها مكنتش متوقع عمرها ما شافت الناس دي ولا ليها صاحبة قريبة من الشخصية دي، أنا شهادتي مجروحة لكن ابهرتني، بقولها ركزي في اختياراتك اللي جاية، وبالنسبة إنها داخلة على مرحلة خطوبة وجواز بقولها حبي جوزك واديله من قلبك لإنه هيبقى شريك حياتك المستقبلي، اختاري أدوارك بعناية لأن الحمد لله عايشة في خير أبوكي فمش محتاجة لفلوس وعايزة تشتغلي يبقى تنقي النجاح اللي حصل السنة دي لازم له استمرارية".
كما وجه حديثه لابنته ملك، قائلًا: "ملك أكتر واحدة في بناتي شرباني كممثل من وهى صغيرة، بتتقمص الدور بشكل رهيب زيي يمكن لسه مجاش الدور المهم العبقري اللي يبين ده بس إن شاء الله هييجي، هى شبهي في التمثيل وبتتقمص وتدخل في الشخصية متعرفش تخرج منها، هى حنونة بشكل غير عادي وحنيتها دي ممكن يتضحك عليها بسهولة حنينة وطيبة زيادة عن اللزوم وعايز أقولها شدي شوية".
أحمد زاهر: منى بنتي مثلت لوحدها
وفي رسالة لابنته الصغيرة منى، قال أحمد زاهر: "مجنناني في البيت، شربات وعسل بتضحكنا بشكل غير طبيعي في البيت مجنونة وشعنونة ونفسي تهدى شوية، أكيد لما تكبر هتهدى، وهى عملت دور جميل مع المخرج محمد سلامة في إمبراطورية ميم دور شبهها في الحقيقة، استغربت جدًا لإن ليلى وملك وهما صغيرين في عمر وسلمى كنا بنقعد معاهم نذاكر ونديهم أداء، لكن منى مثلت لوحدها محدش دربها على حاجة كإن الجينات طلعت جواها وترجع تكلمنا عن الراكور، وحتى في مسلسل ليه لأ كانت لوحدها اختارتها المخرجة من المدرسة".
وتابع أحمد زاهر حديثه عن أصغر بناته نور، وقال: "نور عنيدة أوي وهى اللي ممشية منى ولازم الحاجة اللي عايزاها تحصل نفسي شوية يحصل توازن".
اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة
