مؤلف مسرحية المشهد الأخير: إعلان لمستشفى الحروق ساعدنى
كشف يوسف ناصر مؤلف مسرحية "المشهد الأخير"، التى تم عرضها ضمن فعاليات مهرجان القومى للمسرح على مسرح الطليعة، عن كواليس تحضيراته للعرض وكيفية حصوله على فكرة العرض.
قال يوسف ناصر في تصريح خاص لموقع “بالمصرى” عن تفاصيل تحضيراته للعرض، قائلا: "حنين (البطلة) كانت عايزة تمثل مونودراما، هى مثلت قبل كدا فى عروض تجارية كبيرة، وأنا أول مره أكتب مونودراما أنا كتبت قبل كدا كتير لكن دى أول مرة مونودراما، بس حاولت افكر فى حاجة تقيلة، لحد ما قبلنى بالصدفة إعلان لمستشفى للحروق".
واستكمل قائلًا: "جتلى الفكرة وفكرت فعلًا الناس بتتعاطف مع مصابى الحروق فى الإعلانات بس لكن فى الحقيقة مش بيحصل التعاطف دا، ودى حاجة لحظتها فى الحقيقة كتير وقررت إنى أتكلم عنها".
كما قال أنه أراد كتابة الكلام بشكل غير واقعى حتى لا يمل الجمهور، لأنهم يعلمون حقيقة مايحدث، مضيفًا: "قولت إنى لو كتبت الكلام دا بشكل واقعى الناس هتزهق لأنهم عارفين الحقيقة، عشان كدا لازم يكون فى فانتازيا فى الموضوع وهو تحولها إلى بلياتشو، عشان أقدر أحط خط درامى بحيث إللى بيتفرج يكون مبسوط".
وتحدث يوسف ناصر عن رأيه فى المهرجان القومى، وما يقدمه للمسرح الشباب، قائلًا: "المهرجان دا مهم لأنها بتسمح للعروض المونودراما والقصيرة اللى هى عروض مش عليها إقبال، لإن إقبال الجمهور بيكون على العروض التجارية أكتر، يعنى لو عرضت زى العرض دا تجارى مش هتلاقى حد فى الصالة، عشان كدا المهرجانات مهمة لأنها بتعرف الناس على الأنواع دى".
