محمد سامي: النجم الحقيقي بيحترم مواعيده وفي فنانين مبيجيش منهم إلا المشاكل
تحدث المخرج محمد سامي عن علاقته بالفنانين الذين عملوا معه في المسلسلات وطريقته تعامله معهم في الكواليس.
تصريحات محمد سامي
قال محمد سامي خلال حواره ببرنامج " الحكاية " مع الإعلامي عمرو أديب:"لما بتعصب على حد بيبقى يا إما هو مش شاطر كفاية، أو مواعيده مش مظبوطة، أو مش بيذاكر ولا بيحفظ، وده طبعا بيعطل زمايله".
واضاف سامي:" هو كده هيتسبب في فشله وفشلنا معاه، ويبقى ممثل جاي متأخر ومش مركز ويسلب حقوقنا كلنا، وبتخانق معاه مهما كان مين ونجوميته قد أيه، ؛ لأن النجوم الحقيقيين أصلا محترمين في مواعيدهم وشغلهم، وعمري ما اشتغلت مع نجم كبير ومكنش محترم، دايما المشاكل بتيجي من أنصاف الفنانين".
محمد سامي يتحدث عن الفنانين
وتابع:" في فنانين مبيجيش من وراهم إلا المشاكل، بيبقى عايز طول الوقت يقول أنا نجم، فمش بيفكر في الشغل نفسه، ونجم زي محمد رمضان وأحمد السقا دول ناس تعلم جيدا إنهم نجوم وناجحين، فبيركزوا في شغلهم".
واستكمل:" والنجوم دول أول ناس بتيجي في ميعادها ومنضبطة ، وأكتر ناس مذاكرين وعندهم حرص على نجاح المشروع، زي الفنانين عادل إمام، والراحل محمود عبد العزيز، وأحمد عز، فالمشاكل بتيجي من الناس اللي بتبقى فاكرة إنهم نجوم وبيحاول يثبت ده برغم إن دوره مش هيأثر على بيع العمل بدولار واحد حتى".
اقرأ أيضاً:شريف سلامة: مبسوط بمشاركتي في كامل العدد وبحب أعمل الحاجة وعكسها
