محمد صبحي: رفضت 4 مرات منصب وزير الثقافة لأنه أقل من كوني فنانًا
كشف الفنان محمد صبحي اليوم أثناء حفل توقيع كتاب "الأستاذ سيرة ومسيرة" عن أسباب رفضه لمنصب وزير الثقافة، مشيرًا أنه غير عاشق للمناصب ولا يسعى إليها، ومؤكدًا أن منصبه كوزير أقل من كونه فنانًا.
صرح الفنان القدير محمد صبحي على هامش ندوته المقامة الآن بساقية الصاوي عن أسباب رفضه لمنصب وزير الثقافة قائلًا: "أنا رفضت 4 مرات أن أكون وزير ثقافة لأن ببساطة وزير دي أقل بكتير من أن أكون فنان، وأنا مش بقلل من الوزير أبدًا وفي ناس كتير علماء وعلى أتم الاستعداد يكونوا وزراء، لما يتساب دول ويقع الإختيار عليا أنا هقول ده مش سليم".
تصريحات محمد صبحي
كما تحدث محمد صبحي عن تجربته في مجال الكتابة، وقال: "أنا مبحبش أعمل كتب، وسنة 76 أنا عملت هاملت مع العلم إني مكنتش نجم بمواصفات كلمة نجم بتاع السوق دلوقتي".
وأضاف: "أنا فوجئت بمكالمة مرة من جمال السليني عايز يقابلني وقالي عايز يعملي تمثال، قولتله طيب مش لما اموت! أنا عارف أنكم بتعملوا شغلكم بعد ما الفنان يموت زي بالظبط ما الدولة بتكرم اللي ماتوا، وبتقول الحمد لله مات نكرمه بقى، لكن لقيته بيقولي أنا عاشق لوجهك، وسألته أنا ليه يتعملي تمثال؟ قالي لما تشوف التمثال هتعرف وخليه ذكرى عندك".
واستكمل محمد صبحي: "روحت أشوف التمثال قولتله ثانية أنت إيه التعبير اللي أنت عملته على شفايفي ده! أنا عمري ما عملته قدامك، قالي آه أنا شايف أن التعبير ده بيعبر عن السخرية من العالم".
