زينب تخلع زوجها: جري ورايا بالسكينة في الشارع

بعد زواج دام 10 سنوات، وقفت "زينب.ع" صاحبة الـ36 عامًا، أمام أروقة محكمة الأسرة، لترفع دعوى خلع ضد زوجها "أحمد. ع" صاحب الـ39 عامًا، يعمل سمسار عقارات، معللة استحالة العشرة بينهما بعدما أقدم زوجها على تهديد حياتها، بسبب ما وصفته الزوجة بـ"غيرته من نجاحها" في العمل.

ارتباط عن حب انتهى بالخلع

تروي "زينب" قصة الحب التي وقعت بينها وبين زوجها قائلة: "كان ابن عمي وكنت بحبه من سنين واتفقنا على الجواز واتخطبتله لمدة 4 سنين، سافر فيهم العراق والسعودية لحد ما كون نفسه وبنى شقة في بيت عمي وجهزها واتجوزنا وخلفنا ولدين وحياتنا كانت زي الفلوكويسة".

خسارة كبيرة في عمل الزوج تسببت في وقوعهما في أزمة مالية

أضافت "زينب": "بعد ما رجع فضل عايش يصرف من تحويشة عمره، نصحته كتير يدور على شغل ويجيب تاكسي يشتغل عليه، يقلب عيشه بأي حاجة لكن رفض وراح شارك أخوه في معرض أجهزة كهربائية واتنصب عليهم وراحت كل فلوسه، وقفت جنبه وبعت شبكتي عشان يفضل البيت مفتوح وبدأ ينزل شغل سمسرة عقارات بيع وشراء، والحمدلله بقت الحياة ماشية لكني بقيت خايفة لأن شغله مش منتظم وعندي طفلين، روحت اشتغلت مشرفة حضانة وبقيت أشوف أكل عيشي والحمدلله حياتي مشيت، وربنا رزقني بشغل سمسرة بيعمل فلوس كويسة كمان، وعمري ما خليت بيتي عايز حاجة لكن ده معجبهوش وشاف إني كدا كعبي علي عيله بالفلوس اللي بكسبها وبقى مصر إني أقعد في البيت ومشتغلش".

خلافات زوجية بسبب رغبة الزوج في إنهاء عمل زوجته

كما أوضحت "زينب": "اتعاملت معاه كتير بهدوء لكن دماغه وألف سيف منزلش الشغل تاني أبدا، رغم إني مش مقصرة في بيتي وهو اللي مقصر في المصاريف، وبدأ يرمي كلام إني بذله بفلوسي عشان ربنا فتحها عليا وهو بقى في أزمة وإني خونت العيش والملح واتجوزته عشان كان مقتدر، مع إني عمري ما اشتكيت لحد إني بعت دهبي عشانه، وبدأت الحياة تختلف من ضرب وتهزيق وشتيمة ليا ولأهلي ومفيش فايدة فيه لحد أخر موقف جري ورايا بالسكينة في الشارع حالف يدبحني عشان نزلت الشغل وهو كان حالف علي مروحش، وحياتي وحياة عيالي بقت في خطر معاه مقدرتش أستحمل أكتر من كدا هربت من البيت وسيبت حتى هدومي أنا وولادي ورفعت قضية خلع عشان أخلص منه