طمأنت الجمهور على الزعيم.. شيرين: بلاش كل شوية تموتونا
حرصت الفنانة شيرين أن تطمئن الجمهور عن الحالة الصحية للزعيم عادل إمام، مؤكدة أنها تتواصل معه باستمرار.
وأعربت شيرين عن استيائها من الشائعات التى ظهرت حول حالة الزعيم عادل إمام أثناء لقائها في برنامج واحد من الناس الذي يقدمه الإعلامي عمرو الليثي المذاع عبر قناة الحياة.
تصريحات شيرين
وأضافت شيرين عن حالة الزعيم قائلة: "أنا بكلم عادل إمام باستمرار، وبتطمن عليه وهو الحمد لله كويس وبيرد عليا، ويا رب الناس تبطل تجيب سيرة الناس بحاجات وحشة، وأنهم يحترموا نفسهم شوية".
وتابعت شيرين قائلة: "بلاش كل شوية تموتونا، لو متضايقين من وجودنا جمعونا كلنا في ميدان وموتونا واخلصوا مننا، لكن حرام عليكم تتعبوا أعصابنا كدا، وأنا بقدم تحية كبيرة من روحي وقلبي للأستاذ عادل إمام وأسرته، وزوجته مدام هالة اللي دايما كانت واقفة جنبه، ربنا يديك الصحة ويسعدك بأولادك كمان، وأنا بحبهم كلهم لأن بابا ده هرم كبير وعظيم ربنا يخليه لمصر".
وتحدثت شيرين عن ذكرياتها مع الزعيم قائلة: "اختارني عادل إمام في فيلم الإرهابي، وبعد الفيلم عمل حفلة لكل المشاركين في الفيلم تحت بيته، وإحنا ماشيين قالي مع السلامة يا عديلة، ده هيكون اسمك في الفيلم الجديد، وبعد أسبوعين كلمني وقالي مش هتقدري ترفضي، الفيلم مشهد أنا ومشهد انتِ ومشهد إحنا الاثنين مع بعض".
