بشرى تعلق على انتقادات طارق الشناوي لمصطفى قمر
علقت الفنانة بشرى على الخلافات التى حدثت بين الفنان مصطفى قمر والناقد الفني طارق الشناوي على فيلم أولاد حريم كريم.
وقالت بشرى أثناء لقائها في برنامج الراديو بيضحك، الذى تقدمه الإعلامية فاطمة مصطفى المذاع على راديو 9090: "اللي حصل ده شيء طبيعي، لأن أي عمل لازم يثير الجدل، والناقد شغلته أنه ينتقد العمل الفني، من حيث التصوير والإضاءة والاسكريبت والمونتاج، ومن حقه يتكلم عن أداء الممثلين والوجوه الشابة في العمل الفني".
رد بشرى على الناقد الفني طارق الشناوي
وأضافت بشرى: "لكن الحقيقة ده محصلش اللي حصل مجرد رأي في برنامج مش مكتوب في مقالة زي ما المتعارف عليه من السادة النقاد، والنقد اللي حصل لم يكن مهنيا ولا له أي علاقة بطرف من الفيلم، النقد كان لشخص بطل الفيلم وكمطرب ومش كممثل، إيه علاقة ده بأبطال العمل؟!".
وتابعت بشرى: "الموضوع فيه عاطفة ومينفعش تهاجم نجم كبير عنده 35 سنة من التاريخ، وصعب جدًا اختزال مشوار نجم كبير وناجح، ده يكاد يكون من أكتر المطربين اللي أفلامهم نجحت في السينما، وكما تتجاهل كل اللي في الفيلم يعني محدش فينا جه وتعب ؟.. مدرسة لم ينجح أحد، قاسي شوية وهو لسة مكتبش، والحقيقة بالنسبالي أستاذ طارق منتقدش الفيلم طالما لسه مكنبش مقالة زي المتعارف عليه للنقاد".
وعلقت بشرى على رد الفنان مصطفى قمر على الناقد طارق الشناوي قائلة: "مصطفى قمر رد لأنه وجد شخصه في الكلام، وأيًا كان اسم الناقد هل ده يعطيه الحق أنه يشتم إنسان؟ لأ هو في الآخر مواطن وفيه قانون، ولما تلاقي الهجوم شخصي طبيعي الرد هيكون شخصي، والحقيقة أنا لو حد شتمني هعمله محضر في القسم على طول، وهقوله أنت مش من حقك تشتمني وبتشمني على أساس إيه اصلًا".
وأكملت بشرى قائلة: "مصطفى قمر تضطر يرد بشكل شخصي خاصة أنه انتقده كمطرب مش ممثل، وأنا معنديش نيه التدخل لأن في احترام وود متبادل بيني وبين الأستاذ طارق، وإحنا الاتنين في لقاءات سينمائية مختلفة برا البلد وفي البلد، ولما لاقيت الموضوع في كلام دخلت وقولت رأي من غير أي تطاول ورأي الجمهور في رأي، وأن هذا الصراع بعيد كل البعد عم فيلم أولاد حريم كريم".
كما أشارت بشرى إلى أنها ضد مهاجمة مصطفى قمر قائلة: " أنا من الفانز بتوعه، وأنا شايفة أن الصراع ده جانبي مالوش علاقة بالجمهور، والجمهور دلوقتي بقى زكي جدًا ومش بيضحك عليه، وبصراحة أنا ساعات بتسلل فب صالات السينما وبدخل أشوف رد فعل الجمهور، والناس بتضحك ولا لأ، أصل الناس مش هتجامل في الضحك ومش هتجامل عمرو عبد الجليل أو خالد سرحان، بس هو الفيلم لذيذ و طريف".
