معتز التوني يكشف كواليس الجزء الخامس من مسلسل اللعبة

كشف المخرج معتز التوني عن بدايته في مجال الفن، وآخر أعماله الفنية، وتحدث عن أجزاء مسلسل اللعبة.

تحدث معتز التوني عن بدايته أثناء لقائه في برنامج "كلام في الزحمة" الذي يقدمه الإعلامي مروان قدري ومعتز الجندي المذاع على  راديو نجوم إف إم قائلًا: " أنا خريج قسم إخراج دفعة 96، كانت دفعة مميزة وكان معايا خالد حماد وأحمد الجندي، وفضلت 10 سنين مساعد مخرج، وأول إخراج كامل ليا كان فيلم "سمير وشهير وبهير" ".

تصريحات معتز التوني

ووضح معتز التوني عن الكوميديا قائلًا: " مستوى الضحك بيختلف كل شوية، ولازم يكون عندك كمخرج الإحساس السريع ودمك خفيف، عشان تعرف تجيب الإيفيهات من حوليك، واكيد كل ممثل بيكون عايز يقول إيفيه ولكن الفكرة هنا إنك تنقي الإيفيه الصح، عشان المشهد ميوقعش من مساره الصحيح".

وتحدث عن دخوله في مجال التمثيل قائلًا: " دخولي مجال التمثيل بدأ لما كنت مساعد مخرج، وأنا بدوري بكون قرأت السيناريو، فكانوا بيقولولي تعالى اعمل المشهد ده وكان بينجح، وبعد المخرج أحمد الجندي كلمني عشان المشهد الشهير في فيلم زكي شان مع الفنان أحمد حلمي، فالجمهور بدأ يعرفني وبصراحة حبيت الموضوع جدًا وقررت أكمل الطريق".

وأضاف معتز التوني عن مسلسل اللعبة قائلًا: " كل الكوميديانات من هشام ماجد وشيكو ومحمد ثروت ومي كساب، الممثل عرف خلاص شخصيته ومفاتيحها، فالموضوع بقى أسهل في التوجيه، وإحنا بنصور حاليًا الجزء الخامس من المسلسل".

وتابع معتز التوني عن إجزاء مسلسل اللعبة ونجاحها قائلًا: " نجاح الجزء الثالث كان أقل توقع من الجزئين الأول والثاني، والناس كانت مضايقة مننا وبدأنا نفهم الأخطاء اللي وقعنا فيها، وقررنا أن كل مهمة في الحلقات تكون أسرع، ولما عملنا الجزء الرابع غيرنا الفكرة ودخلة المسلسل كانت مختلفة ومشوقة، وفي الجزء الخامس خلينا الموضوع أصعب ويكون في تشويق أكتر، اللي عملنا النجاح دا الجمهور وهو اللي عايز المسلسل يكمل".

ووضح معتز التوني عن الإستعانة ببعض المؤثرين على السوشيال ميديا قائلًا: " مش كل الناس على السوشيال ميديا لذيذة، وممكن شخص يكون بيعمل فيديوعات حلوة جدًا بس قدام الكاميرا الموضوع مختلف، غير الممثل اللي دارس وتعلم في المعهد، لأن الوقفة قدام الكاميرا غير الموبايل تمامًا".

وكشف عن أعمالة الجديدة قائلًا: " في فيلم مع هشام ماجد وتايسون اسمه (إكس مراتي)، وفيلم تاني مع كريم محمود عبد العزيز، وهنبدأ تصوير الجزء الخامس من اللعبة بعد شهر رمضان، ونفسي أوي أقدم عمل مسرحي قريب".