حسين فهمي: رفضت إخراج فيلم لفاتن حمامة وإسماعيل ياسين سبب دخولي المعهد

أقيمت ندوة الفنان حسين فهمي ضمن فعاليات مهرجان الغردقة لسينما الشباب فى أولى دوراته، حيث تحدث عن بداية دخوله لمجال السينما، موجهًا نصيحة للشباب من الجيل الحالي وعن رفضه لعرض كان سيجعله مليونير.

دخول حسين فهمي مجال السينما

تحدث الفنان حسين فهمي عن أهمية المهرجانات، وعن حبه للسينما، قائلًا: "المهرجانات السينمائية المصرية مهمة جدًا، لأنها تعتبر من أفضل أنواع الصناعة، أنا بحب السينما جدًا من وأنا عندى 8 سنين وكنت بحلم أدخل العالم دا، قررت أني أبقى مخرج وأنا عندى 14 سنة، لكن دخلت كلية الحقوق وبعد كدا سحبت ورقى علشان أدخل كلية الفنون".

روى حسين فهمى موقف مع المخرج نيازي مصطفى أثناء تأديته لاختبارات القبول، قائلًا: "من ضمن الأسئلة اللي اتوجهتلى فى الاختبار عن أفلام إسماعيل ياسين فانتقدتها وقولت عليها أنها تقليد للأفلام الأجنبية، واتفاجأت أن نيازي مصطفى مخرج أفلام إسماعيل ياسين من أعضاء اللجنة، قولت أنا خلاص سقطت لكن اللى حصل اني اتقبلت ودخلت المعهد"

حسين فهمى يرفض عرض يجعله مليونير

وكشف حسين فهمي عن بعض المواقف التى تعرض لها في بدايته، قائلًا: "فى البداية أهلي رفضوا دخولي المجال لكن بعد كدا تقبلوا، وقررت أسافر بعثة واشتغل فى هوليوود، لكن سبت الشغل وروحت أشتغل فى محل موبيليا، وأتعرض عليا وقتها عرض يخلينى مليونير فى وقت قصير، لكن رفضت وقولت أني عايز أشتغل فى السينما، رجعت وجتلى فرصة أنى أشتغل مساعد مخرج مع يوسف شاهين وبعدها بدأت أمثل".

نصيحة حسين فهمي للشباب

وجه حسين فهمى نصيحة للشباب، قائلا: "أنا بحكى القصص دى للشباب، لأننا فى مهرجان لسينما الشباب، ولازم تعرفوا أحلامكم وتسعوا لتحقيقها، ماتخلوش كلام الناس يفرق معاكم، خلى عندك ثقة فى نفسك عندك هدف عايز توصله متبصش حواليك، ماتعملش مقارنة لكن أعرف الشخص دا نجح ليه ولو منجحش إيه عمله خلاه منجحش".

حسين فهمي يرفض الإخراج لفاتن حمامة

صرح حسين فهمي عن رفضه لإخراج فيلم للفنانة الكبيرة فاتن حمامة، قائلا: "مكنتش عايز أقع فى فخ تنفيذ أوامر نجمة كبيرة زى فاتن حمامة، وكنت عايز أعبر عن نفسى أكتر، وهى كانت وقتها نجمة ساطعة".

تعاون حسين فهمي فى فيلم مافيا

قال حسين فهمي عن مشاركته فى فيلم مافيا، الذى ظهر فيه بمشهد واحد فقط، قائلًا: "شريف عرفة كلمنى فى الأول ولم أقتنع فى البداية، وقالى أن مدحت العدل هيكلمنى ولما قرأ المشهد وافقت لكن طلبت عدم كتابة اسمي على التتر ليكون مفاجأة للجمهور".

متابعا: "الفنان لازم يكون ليه مزاج فنى، ويشتغل من منطلق الهواية ودا اللى هيعكس دوره ويسعد بيه جمهوره، ماينفعش الفنان يدور على المال فقط".