الفن مرض.. نيللي كريم تكشف عن بدايتها الفنية

كشفت الفنانة نيللي كريم عن بدايتها الفنية، مشيرة إلى أن الفن بالنسبة لها يعتبر «مرض» لأن من يدخله لا يستطيع تركه.

نيللي كريم

وتحدثت نيللي كريم عن الفن أثناء لقائها في برنامج "أسرار النجوم" والذي تقدمه الإعلامية إنجي علي المذاع عبر راديو نجوم إف إم قائلة: "أنا بحب شغلي أوي وبحترمه، وبعتبر الفن مرض من الأمراض بمجرد ما يكون التمثيل مهنتك صعب تسيبه".

تصريحات نيللي كريم

وعن بدايتها الفنية قالت نيللي كريم: " ما كنت في روسيا درست موسيقى وبيانو، ودرست باليه وبعدها إخراج مسرح، وبشكل تدريجي انتقلت للتمثيل، وبدأت طريقي في التمثيل بالفوازير المبنية على الاستعراضات، واشتغلت مع الفنانة الكبيرة فاتن حمامة وعملت دور طالبة في معهد البالية بأكاديمية الفنون، والدور كان واقعي".

الفنانة نيللي كريم 

وأضافت نيللي كريم قائلة: "أنا كنت بعلم نفسي بنفسي وواسطتي كانت نفسي، ووقتها السوشيال ميديا مكانتش زي دلوقتي فكنت بستنى أعرف رأي الجمهور، ولحد دلوقتي في مسيرتي المهنية لسة بتعلم، أنا مش بعيش على نجاح عمل واحد وبستنى اللي هقدمه بعد كدا".

ومن جانب آخر تحدثت نيللي كريم عن مسلسل ب100 وش قائلة: " كنت وقتها نفسي أعمل حاجة كوميدي، وأنا بحب أكون مخلصة لأي شخصية أقدمها، زي دوري في مسلسل فاتن أمل حربي، وقتها كان لازم أمحي شخصية نيللي كريم تمامًا، وأقدم شخصية فاتن زي ما ظهرت".

وكشفت نيللي كريم عن أعمالها الجديدة قائلة: " هقدم شخصية كوميدية اسمها فراولة، هو مسلسل كوميدي من 15 حلقة".

وأشارت نيللي كريم إلى أزمة المسلسلات ذات الـ30 حلقة قائلة: " مشكلتنا في المسلسلات الـ30 حلقة أنها بتكون محتاجة وقت طويل عشان مش بتكون جاهزة في الوقت المحدد، وبنضطر نسلم العمل وبيكون مش بنفس الكواليتي اللي عايزنها، ودي بتكون حاجة وحشة ومؤلمة لأنك بتشتغلي ساعات طويلة، لكن الأحسن والأوقع دلوقتي يكون الـ15 حلقة مكتوبين كويس أوي ويتعرضوا، والـ15 حلقة بتخلي فرصة لناس كتير تشتغل، واحنا شوفنا منى زكي السنة اللي فاتت قدمت عمل كويس أوي، وده بيثبت أنه مش شرط نقدم 30 حلقة".