أحمد حلمي: "أخويا السبب في فقدان صوتي ووالدي ضربني بالقلم"

حل الفنان أحمد حلمي ضيفًا في برنامج “AB talks” مع الإعلامي أنس بوخش، وكشف عن العديد من الأمور التي تتعلق بحياته الشخصية والمهنية، إلى جانب حديثه عن علاقته بوالده ومرحلة الطفولة.

رد أحمد حلمي على سؤال أنس بوخش عن طفولته، قائلًا، إنه أدرك بعد مرو الوقت أن طفولته لم تكن ما يريد أن تكون، ولكنه كان مستمتع بها، وأضاف: "أنا مقصدش أنها كانت طفولة مشردة لكن كان نفسي أكون بعرف لغات لإنك بتتعلمها وانت صغير وكان نفسي أكون بسافر، وكده يعني في حاجات كان نفسي تكون أفضل لكن أنا بحب طفولتي قوي".

سبب فقدان أحمد حلمي لصوته

أما عن سبب فقدانه لصوته في الطفولة، قال أحمد حلمي: "كان في مرة أنا واخويا في البيت وكان عندنا مسحوق غسيل وهو كان أكبر مني بسنتين ومرة رمى جزء من مسحوق الغسيل فدخلت في فمي وبلعتها وصوتي راح ساعتها".

وأضاف حلمي: "عشت طفولتي في السعودية واللحظة اللي بنرجع فيها إلى القاهرة كانت بتبقى لحظات سعيدة قوي وعمري ما انساها ومشهد سفرنا من القاهرة لبنها كان لا ينسى برضو"، ناسي جزء كبير من طفولتي بس فاكر مرة لما والدي ضربني بالقلم لإني خالى كان بيربي حمام غالي وأنا طيرته".

تصريحات أحمد حلمي

وتابع: "ساعتها خالي راح اشتكى لوالدي وأنا قولتله إن أخويا هو اللي عمل كده، لكن طبعًا اتكشفت واتضربت، ولكن في الآخر الحمام رجع تاني بيته، وبسبب دة عرفت أن في مواقف الطفل مش هينساها وبتعلم في نفسيته وممكن تجرح ابنك بدون وعي".

وردًا على سؤال، هل ينسى الطفل مواقف الطفولة، قال حلمي: "اعتقد إن أي حاجة أثرت فيك مش هتنساها وإلا هيتحول لمشكلة نفسية ولو العقل حجب الموقف معناه أن المشكلة كبيرة وصادمة قوي".

علاقة أحمد حلمي بوالده

وعن علاقته بوالده، استكمل أحمد حلمي: "دي من الحاجات اللي نفسي ارجع طفل علشان أعيشها تاني لأن ابويا مات وملحقتش اشبع منه واعيش معاه مرحلة الصداقة كنت لسة متخرج من الجامعة وانا كنت في القاهرة وأهلي في بنها وطفولتي كنا في السعودية ومكنتش فاهم إني لازم اشبع منهم وانا ملحقتش اشبع منهم ووالدي كان مريض ودي من اللحظات الصعبة إني حسيت بالعجز ومش قادر اعمل حاجة لحد بحبه".