"يمهل ولا يهمل".. تامر حسني: "اللي بيسأل فين ربنا مش هرد بالآيات"
نصح الفنان تامر حسني متابعينه الذين يتساءلون عن وجود الله في حل لخلافاتهم، حيث أنه حرص الفترة الماضية على التقرب من الجمهور وتوجيه العديد من الرسائل لهم.
نشر تامر حسني عبر صفحته الرسمية على موقع فيسبوك معلقًا: "في الوقت ده ناس كتير ممكن إيمانها بربنا يتزعزع أو ينهار، ويبدأوا يقولوا طب ربنا فين أنا مش هرد بالآيات والأحاديث وده عشان في ناس أحق مني يتكلموا بلغة الدين، بس أنا هرد رد بسيط من واقع الدنيا".
نصيحة تامر حسني
وأضاف تامر حسني قائلًا: "أنت لو دخلت فيلم وجالك تليفون فاستعجلت ومشيت في الربع الأولاني منه، هل هتقدر تحكم على نهاية الفيلم، أكيد لأ متحكمش على حاجة لسة مخلصتش، طيب الدنيا لسه شغالة ومخلصتش يعني منعرفش بكرا ربنا شايل ايه، ياريت منستعجلش ونحكم على الدنيا وأنت لسه مشوفتش مرحلة النصر اللي ربنا وعد بيها اصلًا في قرآنه، متحكمش دلوقتي حكمك هيكون غلط عشان احنا لسه مكملناش الدنيا للآخر، يمهل ولا يهمل واللي راحو دول جريوا على الجنة اللي هي الحياة الأساسية، حياة الخُلد راحو دار الحق ومشيوا من دار الباطل".
وتابع تامر حسني قائلًا: "يا جماعة الدنيا دي ولا حاجة دي دار باطل فيها الكره والشر والظلم والحقد، لكن الناس دي راحت لحياة كلها حب وخير وفرح وسلام، ولما في الآخره نشوف كل حد كانت حياته صعبة ومليانة معاناة ازاي ربنا كافئه على صبره وتحمله من كل اللي شافه وكرمه بأجمل نعيم الجنة، هنقول وقتها ياريتنا كنا احنا، الصبر ياجماعة في وعد ربنا".
واختتم تامر حسني قائلًا: "دلوقتي الدنيا وسكان الأرض انقسموا 2، ناس إيمانهم راح وناس اتمسكوا بإيمانهم أكتر، ودول أكتر ناس كسبوا في معركة الدنيا، خليكوا واثقين في كتاب الدنيا العظيم وأنكم لازم هتسقفوا في النهاية من حلاوة نصره، وهو بينصر المظلوم بمعجزة من عنده، وبتتحقق في الوقت المناسب اللي هو يعلمه مش احنا، ياجماعة اوعوا إيمانكم بربنا يتهز احنا كلنا أصلًا عايشين في اختبار، ولازم ننجح فيه إن شاء الله هتشوفوا بعنيكم أكبر رد من ربنا، كما وعد هو في قرآنه الكريم.. ثقوا في ربنا وأن وعد الله حق".
