سامح حسين: عادل إمام لو زعل مني يبقي شرف ليا

حل الفنان سامح حسين ضيفا ببرنامج “ مساء الإمارات” الذي يقدمه الإعلامي عبد العزيز أحمد، وتحدث سامح حسين خلال اللقاء عن بداياته الفنية وكواليس مسلسل راجل وست ستات، كنا تحدث عن سبب رفضه لدور في مسلسل “ڤلانتينو”.

وقال سامح حسين،: "رمزي في راجل وست ستات هو اللي عرفني على الناس رغم انه كان عندي أدوار  قبل كده بس دة اللي اتشهر، التيم كله من ورشة الكتابة والمخرج والثنائي اللي قدمناه أنا واستاذ أشرف كانوا شبه لوريل وهاردي الاتنين كانوا أغبى من بعض وكان بيشرح حاجات غلط".

وتابع: "احنا اشتغلنا 7 مواسم وكل موسم كان  34 حلقة وانا في الأول كنت بقوله عادل وانا بشتغل على الورق كتير فاقترحت اني اقوله "دولة حبيبي" كل ما يزعقلي لإنها هتبقى الطف".

وأضاف: “أنا مفكرتش أقدم شخصية رمزي لوحده ولكن لو اتعمل تاني المسلسل هشارك فيه”.

وعن مسلسل "راجل وست ستات"، قال: "الثنائي ضاف للمسلسل وأشرف عبد الباقي كان متسامح جدا لأن في حلقات رمزي كان بيضحك اكتر وكان في حب وتفاهم في فريق العمل".

وعن زوجته قال "مراتي هى كل  حياتي وهي شايلة مسؤليتنا  ومتطلبات البيت كله، وهي ست بيت هايلة وبرة البيت مشرفة وبنعمل مسلسل وفيلم حاليًا من تأليفها".

وأجاب على سؤال عبد العزيز أحمد عن رأيه في النجم الراحل سمير غانم وقال: “سمير غانم هو رسول الضحك وكان ليا الشرف اني اشتغلت معاه في مسلسل كان ضيف شرف فيه وموافقته أنه يشترك في المسلسل دة شرف لينا ورسالة أن الشخص مهما كبر بيجي يساعد الأجيال الجديدة واتمنى اشتغل مع دنيا سمير غانم هي بتجيد كل الأدوار وموهبة جبارة".

وعن عادل إمام قال: "عادل إمام مدرسة ونفسي اشتغل معاه وهو قيمة كبيرة وبيثقل المهنة".

وعن اعتذاره عن المشاركة في مسلسل فلانتينو قال "هي مكنتش فرصة لأن الفرصة اني اشتغل مع قيمة كبيرة حتى لو دور صغير واني استفيد بوجودي معاه وكل حاجة ليها ظروفها وانا بحب ابقى مبسوط مش مجبر وهو مزعلش مني وانا مين علشان يزعل مني ولو زعل مني دة شرف ليا".

إقرأ أيضًا:حكاية شخصية الأسد التي جسدها سامي العدل في مسرحية عادل إمام