كريم قاسم: "مسلسل زينهم أحسن حاجة حصلتلي في 2023 والشخصية متلبساني"

حل الفنان كريم قاسم ضيفًا على برنامج “عيش صباحك” مع الإعلامية فانا إمام، وذلك عبر إذاعة قناة نجوم إف إم، وتحدث خلال الحلقة عن أحدث أعماله الفنية وهو مسلسل “زينهم”.

قال كريم قاسم خلال الحلقة: “زينهم أحسن حاجة حصلت لي في 2023، ودي حاجة كويسة الواحد يقفل بيها السنة”، وعن شخصيته دكتور جيمي التي يقدمها خلال المسلسل، أضاف: “الشخصية متلبساني قوي وأي حد من أصحابي بيشتكي لي من حاجة في جسمه بقيت بقول له وريني كده وأقعد أفسر له وأتحقق من الموضوع.. كنت متخيل الموضوع هيبقى أصعب من كده لكن اللذيذ إن الكاتب طبيب فكان في مصطلحاته وتفسيره ساعدنا، وكان فيه أصدقاء دكاترة ساعدونا وبرده من كتر الفرجة على شخصيات الدكاترة قبل كده”.

تصريحات كريم قاسم عن مسلسل زينهم

وأضاف كريم قاسم: “التركيز في المسلسل أكتر على القضايا والجانب الاجتماعي للشخصيات والمخرج بذكاء حاول يتفادى مناظر الجثث والإصابات علشان يبقى مناسب للأطفال والعيلة مع إنه كان يقدر يدخل في التفاصيل، أول ما قرأت الورق حسيت إن جيمي ده دوري ومكتوب لي لأني كنت متخيل هعمل فيه إيه بالظبط، واللي اتنفذ كمان عدى اللي كنت متخيله بعد التعاون مع المخرج اللي كان فاهم وكمان الشغل مع أحمد داود زي لعب الكورة وبنساعد بعض وكنا داخلين ننبسط وكنا محضرين كويس”.

مسلسل “زينهم” من بطولة الفنان أحمد داود، كريم قاسم، سلمى أبو ضيف، هناء الشوربجي، محمد أبو داوود، أحمد الرافعي، عماد رشاد، وآخرين، تأليف محمد سليمان عبد المالك، وإخراج يحيى إسماعيل.

اقرأ أيضًا: طه دسوقي يعاني من حالة نفسية وغادة عادل محامية.. ملاحظات على إعلان مسلسل حالة خاصة