بعد تصريحات العسيلي عنه.. حسن شاكوش: "مش حافظ ليك أغاني واللى مش هيتحترمنا مش هنحترمه"
رد مؤدي المهرجانات حسن شاكوش على تصريحات المطرب محمود العسيلي الأخيرة، الذي تعجب من خلالها اعتلاء مطرب غير مشهور صدارة الأعلى استماعًا في الوطن العربي.
قال المطرب حسن شاكوش في لايف عبر حسابه الشخصي بموقع إنستجرام: “مينفعش نبقى في وش بعض نتكلم بأسلوب، وفي الضهر نتكلم بشكل تاني وبطريقة تانية، أنا مبحبش البني آدم اللى كده، محمود العسيلي جالى كذا حفلة وبنزل الاستيدج وأروح أسلم عليه ده ذوقيًا مني، وده اللى اتربينا عليه”.
رد حسن شاكوش على محمود العسيلي
وأضاف حسن شاكوش: “يعني انت عرفت اسم عصام صاصا ومش عارف أغانيه، مينفعش يكون عصام صاصا تريند وأطلع أقول معرفش بيغني إيه، أقسم بالله مش عشان حاجة أنا مش حافظ أغاني لمحمود العسيلي ولا أعرفها، إحنا الحمد لله والشكر لله مسمعين وموجودين في الوطن العربي، اللى هيحترمنا هنشيله فوق دماغنا، واللى مش هيتحترمنا مش هنحترمه، مينفعش يطلع من بوقي لفظ يضايق أي حد وأنا بيسمعني عائلات وأطفال”.
واختتم حسن شاكوش حديثه قائلًا: “بتقول الراب كمان هينتهي، طب لما الشعبي والراب هينام مين هيبقى موجود؟.. أمال مين هيرقص الناس، إحنا لازم نحترم بعضينا ونقدر بعضينا ونخاف على مشاعر بعض، أنا راجل بغني وفي سوق ووسط النجوم فلازم أكون عارف ده بيغني ايه وبيعمل إيه، عيب إنك تقول عصام صاصا ومش عارف بيغني إيه عصام صاصا؟ بيغني هيندي؟ ربنا يهدي الجميع”.
اقرأ أيضًا: طه دسوقي يعاني من حالة نفسية وغادة عادل محامية.. ملاحظات على إعلان مسلسل حالة خاصة
