محمد رمضان: منتخب غانا معايا في نفس الفندق وعندي مشاريع لإفريقيا
كشف الفنان محمد رمضان عن تواجده بنفس الفندق الذي يقيم فيه لاعبي منتخب غانا لكرة القدم، والذي من المفترض أن يواجه المنتخب المصري خلال كأس الأمم الأفريقية الحالية.
تصريحات محمد رمضان
قال محمد رمضان خلال مداخلة هاتفية على قناة Dmc :"أنا موجود في الفندق اللي موجود فيه منتخب غانا، وفي نفس الدور عندي، مش عارف دة غلط من الشركة ولا إيه؟"
وأضاف:"أعتقد لو واخدين بالهم إني مصري هيخافوا يعملوا كده، والدور كله ريحته أبو فاس تقريبًا في علاج طبيعي بيتم للاعيبة في الدور مش عارف أعيش، مش عارف هل دي حاجة طبيعية ولا إيه أنا مش عارف أنام من الريحة".
الأغنية الرسمية لكأس الأمم الإفريقية
كما تحدث محمد رمضان، عن كواليس اختياره لـ تقديم الأغنية الرسمية لكأس الأمم الإفريقية، قائلًا: “ أنا مؤمن بحاجة اسمها قانون الجذب، أن الشيء طول مانت بتحلم بيه وبتسعى ليه هو كمان بيسعى لينا، وفي صلة رحم كبيرة وعلاقات بينا وبين الوطن العربي كله، ولكن بننسى إنتمائنا بقارتنا واللي بيربط ده كرة القدم”.
وتابع محمد رمضان: “ كنت بتسأل ليه الفن مش بيربط ده زي ما كرة القدم عاملة، وكنت عامل أغنية مع مغني أمريكي اسمه فيوتشر، والشركة الأمريكية دي جالها إيميل من القسم الخاص بـ إفريقيا وتم إختياري ، والغريب أنهم قالوا ليهم عايزين مغني يمثل إفريقيا وأنا بغني من 5 سنين، مبسوط جدًا وفخور بوجودي، ويارب يكون وشي حلو على المنتخب ويارب نكسبها للمرة الثامنة بعد عمر طويل أوي”.
وأضاف محمد رمضان: “الاختيار بيكون بناء على الدراسات ونسبة الاستماع، وأنا كان عندي مشاريع لإفريقيا ده هدف عندي، وخدت جائزة سنة 2018 عن أغنية مافيا، والاهتمام الإعلامي كان على الشق التمثيلي أكثر من الغنائي ، ولكن الشق الغنائي أنا باخد خطوات من غير ما حد يحس ويارب أكون عند حسن ظن الجميع".
اقرأ أيضا:كيف علق صناع ألبوم مكانك للهضبة عمرو دياب على طرحه اليوم؟
