شاهيناز: الحجاب مبعدنيش عن الفن وحاليا مش قادرة أكون محجبة
كشفت المطربة شاهيناز سبب غيابها عن الساحة الفنية خلال الفترة الماضية، مؤكدة أن الحجاب لم يكن السبب في ابتعادها عن الفن والغناء.
تصريحات شاهيناز
قالت شاهيناز في تصريحات تليفزيونية:"كل حاجة في الدنيا نصيب، وأنا خدت قرار الابتعاد عن الفن بمحض إرادتي ومحدش غصبني، وابتعدت وقت ولادة ابني وقررت اتفرغ له تمامًا، وأنا بشوف أن الطفل ده مسؤولية كبيرة جدا، وحسيت أن هو أولى بكل وقتي وطاقتي واهتمامي، وأنا في الفترة دي نفسيًا كنت حاسة إني عايزة ابعد عن كل حاجة، وأفضل جنب ابني أكتر حد بحبه في الدنيا".
واستكملت: “فترة غيابي عن الفن خلتني اتجه للحجاب، ولكن الحجاب مبعدنيش عن الفن وبعد ما اتحجبت بـ سنتين أو 3 سنوات غنيت، وقدمت أغاني اجتماعية ودينية وأنشودة مديح في الرسول، وعملت أغنية اسمها شكرًا أوي وكنت لابسة الحجاب، والحجاب مكنش عائق في إني أغني”.
شاهيناز تتحدث عن الحجاب والفن
قالت شاهيناز:" الوسط الفني ممكن يتقبل فكرة الممثلة المحجبة عن المغنية شوية، لأن في بعض الموروثات الفكرية في مجتمعنا العربي مبتقبلش ست تكون بحجاب وتغني، يمكن في آخر 4 سنين شوفنا نداء شرارة وهلا رشدي، وفي وقتي الناس مكنتش متقبلة ده أوي".
رأي شاهيناز في تحريم الفن
وعن رأيها في تحريم بعض الفنانيين المعتزلين، لـ الفن، فعلقت قائلة: “ مقدرش أحكم على بني آدم هو شايف الدنيا من منظور إيه، هو شايف حاجة ممكن أنا مكونش شايفاها، وكل واحد بيختار الأنسب لحياته، وربنا خلقنا عندنا إرادة وعقل والبني آدم بيغلط دائماً، وممكن أخد قرار وارجع بكره أندم عليه”.
اقرأ أيضا:عمر طاهر: حبيبي الأولاني أول أغنية اكتبها والڤيديو بيوصل المعاني للجمهور أفضل
