محمد لطفي: مفيش صوت شتوي في الحر ده وشرخت صوتي في شخصية فرعون

حل الفنان محمد لطفي ضيفًا مع المذيعة ياسمين عز في برنامجها كلام الناس الذي يذاع على قناة "إم بي سي مصر"، وتحدث أثناء استضافته عن علاقته مع زوجته وتحضيره لشخصيات قدمها في أعماله وعدد من الأمور الشخصية في حياته. 

أبرز تصريحات الفنان محمد لطفي مع ياسمين عز

تحدث الفنان محمد لطفي عن علاقته بزوجته، قائلًا: "مفيش أي صوت شتوي في الحر ده، الحياة عادية وبسيطة، أنا راجل بسيط والزواج حاجة جميلة، بيحتاج صبر ومودة ورحمة، بقالي 18 سنة متجوز، والحب دايمًا موجود جوه الإنسان وطريقة كل شخص في التعامل بتبين هو بيحب ولا لأ، وأنا كرجل في فترة الخطوبة شرحت شخصيتي لمراتي وقولتلها طريقتي في الحياة وفي الشغل، وممكن المدام تكلمني مردش وأنا مركز في دور أو شخصية، وهي قدرت ده وعرفت بالفترة والوقت، وحياة الفنان بتبقى مختلفة".

وعلق محمد لطفي على طريقة تعامل الزوجة مع زوجها في السابق، قائلًا: "دلوقتي في بنات جميلة وكويسة، ما انتي أهو يا ياسمين خيال، أفكارك كويسة وزمان كان الستات بتقول للرجالة يا سي ومعناها يا سيد، ولو معدي في المطبخ خد يا سي محمد ده كلام، ممكن يضربها بالفازة مثلًا، والحياة مش ثابتة وكل حاجه بتزيد أو بتقل، ولازم الواحد يتحمل الحياة بكل ظروفها".

محمد لطفي يكشف كواليس شخصيته في فيلم كباريه

كشف الفنان محمد لطفي عن تحضيراته لشخصية فرعون في فيلم كباريه، وعلق: "بتعايش مع شخصياتي أحيانًا، وفي حالة فصل مينفعش أبقى طول الوقت بختار شخصيات صعبة، بحاول أفصل بردو في الحياة عادي، وأحيانًا في شخصيات بتأثر عليا شخصيًا لما يبقى فيها شر جامد، وفرعون في فيلم كباريه أكثر شخصية أرهقتني لإني شرخت صوتي وقتها، وكنت باخد أدوية وعملت تمارين صوت لغاية ما جبت تون الصوت ده، وكان في شخصية حقيقية زي فرعون وكان صوتي عريض، ومعنديش صوت صوتي دلوقتي هو صوت فرعون، وعلشان أوصلها تاني محتاج تمارين".

محمد لطفي وعلاقته بالمطبخ 

ذكر الفنان محمد لطفي علاقته بالمطبخ، قائلًا: "أي ست مبتحبش حد يدخلها مطبخها، علشان إحنا لما بنطبخ بنهبدل الدنيا، وأحيانًا بدخل وأعمل أكل، وبعرف علشان قعدت فترة لوحدي، بس ببقى عايز 3 مساعدين، والإحساس بطعم الأكل نعمة".