لبلبة: بكيت أثناء تكريم عادل إمام لهذا السبب

راندا نبيل

الإثنين 29/يناير/2024 - 02:02 م

علقت الفنانة لبلبة على تكريم الفنان عادل إمام وحصوله على جائزة زعيم الفن العربي، في حفل joy Awards، والتي أقيمت بمدينة الرياض بالمملكة العربية السعودية.

تصريحات لبلبة

قالت لبلبة في تصريحات تليفزيونية:"بكيت أثناء تكريم عادل إمام، لأنهم جابوا لقطات من أعماله، والعينين دي عينين الأستاذ عادل، تضحك وتبكي، يديكي البؤس والغلبان والفرحان، هو فعلًا زعيم الفن وحبيبنا، عادل إمام بياخد قلبي، ولما أشوفه أبقى حاسه إني شايفة الفن كله".

وأضافت: " انا وعادل إمام عشرة عمر وسنين طويلة وعملنا آخر مسلسلين صاحب السعادة ومأمون وشركاه، أنا بعتبر كل مسلسل فيهم 5 أفلام، بنشتغل 7 شهور وكل يوم مع بعض وبناكل ونفكر ونمثل مع بعض، أنا عاشرت سينمائيين والأستاذ عادل إمام أكتر ما عشت مع أهلي".

واستكملت: “العشرة بيني وبين عادل كبيرة وبحس بيه وبعينيه وإمتى هيقول إيه وليه ، لا يمكن أبوظ له إفيه، وهو عارف أنا بحبه قد إيه وبخاف عليه قد إيه، وبعرف هو زعلان ولا مبسوط من مشيته في الطرقة بتاع الاستوديو”.

نصيحة عادل إمام للبلبة

أما عن النصحية التي وجهها لها الزعيم عادل إمام، فعلقت لبلبة، قائلة: وقت مرض أمي خد 16 سنة هو كان خايف عليا جدًا، وكنا تقريبًا حاسين أن مرضها صعب جدا، فكان دايمًا بيسأل عليا وعليها هو وعائلته مدام هالة زوجته، ولما ماما اتوفت مبقتش أكل وخسيت، ويوم العزاء قعد جمبي وقالي كلي علشان خسيتي وبقى شكلك يقرف الكلب، وطبعًا أنا ضحكت هو دمه خفيف".