عمرو سلامة: اشتغلت مدرب كلاب وفكرت في اعتزال الإخراج وقت مسلسل "طايع"
كشف المخرج عمرو سلامة عن تفكيره في الاعتزال وقت تصوير مسلسل "طايع" للفنان عمرو يوسف، وذلك بسبب وفاة صديقه المخرج روبير طلعت.
تصريحات عمرو سلامة
وقال عمرو سلامة، خلال لقائه في برنامج "أسرار النجوم"، مع الإعلامية إنجي علي، عبر إذاعة وقناة "نجوم FM": "أنا لحد دلوقتي مشوفتش مسلسل طايع من وقت ما خلصت تصويره، لما بفتحه بفتكر حاجات حصلت، وجالي صدمة نفسية كبيرة بعد وفاة المخرج المنفذ وصديقي روبير طلعت وقت التصوير، دا كان موقف خلاني أحس إني مش عايز اشتغل الشغلانة دي تاني، روبير طلعت توفي معايا وأنا بكلمه على التليفون".
عمرو سلامة يتحدث عن وفاة المخرج روبير طلعت
وتابع عمرو سلامة: "كنا المفروض هنسافر نصور برا وأنا مسافرتش، وهما راجعين كان لازم هو يستنى يوم زيادة، كلمني في يوم وكان صوته غريب وباين عليه التعب، وفضلت معاه على التليفون لمدة ساعة لحد ما الممرضة أخدت التليفون وقالت لي إنه توفي، وأنا اللي اضطريت أقول الخبر لأهله ولزوجته، ودا كان قبل رمضان بـ4 أيام ولازم أكمل تصوير المسلسل، دا كله بسبب الضغط العصبي بتاع الشغل".
صدمة عمرو سلامة بوفاة روبير طلعت
وأكمل: "من وقتها مقدرتش أتجاوز الصدمة ومش عايز أعمل أي مسلسل لرمضان، وبعد المسلسل سافرت برا قعدت 12 يوم في كوريا أفكر أنا عايز أعمل إيه في حياتي، أنا والدي توفى قبل المسلسل على طول، وبعده دكتور أحمد خالد توفيق واللي كنت بعتبره الأب الروحي ليا، وكنت بصور ومقدرتش أحضر الجنازة وبعده المخرج المنفذ، المسلسل ده بالنسبة ليا فترة صعبة في حياتي".
عمرو سلامة يفكر في تغير مهنته
وأوضح عمرو سلامة أنه فكر في فترة من حياته في تغيير مهنته قائلا: "في لحظات من كتر الضغط العصبي اللي كان عليا، فركت في مهن تانية وبدأت ادرسها، وفعلاً سافرت برا ودرست تصميم الأحذية لأني بحب الجزم وبحس أن فيها فن، وفي فترة اشتغلت مدرب كلاب، وأنا شخص مش بخاف أني أدخل في مساحات برا مساحة الراحة بتاعتي".
اقرأ أيضاً:في ذكرى ميلاد شرير السينما... هل دفن محمود المليجي شقيقته حية؟
