تامر حسني يوجه رسالة إلى بسمة بوسيل بمناسبة عيد الأم
شارك الفنان تامر حسني جهوره ومتابعيه رسالة تهنئة مهمة بمناسبة عيد الأم، وذلك عبر حسابه الشخصي على موقع الفيسبوك.
تامر حسني في عيد الأم
كتب تامر حسني على صفحته بالفيسبوك، قائلا: "جمعة مباركة يا أغلى الناس، النهارده بكتبلكم بوست عن الأم و نفسي من جوه قلبي تقروه من أخ لأخواته و ناتج من تجربة حقيقية بيني و بين أمي، هحاول اختصره لأن الكلام عن الأم يحتاج كُتب كتير.
وتابع تامر حسني: "هبدأ كلامي بأن أكتر موقفين في عمري زعلت فيهم هما اللي كنت معاندها في الرأي وكل الناس كانت في كفه و هي لوحدها في كفه، أقسم بالله الأم بتشوف وبتحس اللي أنت متعرفش تحسه، اوعى تقول أنا خلاص كبرت ومش هاخد رأيها، والله والله بيبقى عندك دليل وحد بيطمنك أو بينبهك من مستقبل الموقف وأنت مش عايز تسمع و فاكر إن هي مش مواكبة الدنيا فهيكون رأيها راجعي تفتكر ربنا هيخلق قلب أم له فترة صلاحية يعني بيحس لفتره محدوده !؟ أكيد لا مركز إحساسها ممدود لآخر العمر، في حاجة جواها بتقولها يا اه يا لأ. صدقوها.
واستطرد كلامه: "افتكر مرة زمان أمى فضلت تقولي على واحد صاحبي إنه مش كويس وغدار وحقود، أنا فضلت أقولها حرام عليكي دا أحسن واحد في صحابي و أدافع عنه باستماته لحد ما الأيام دارت و فعلاً خرج منه الجرح الكبير والحقد الكبير اللي ميطلعش من إنسان بيكرهني اصلاً، وعرفت ساعتها إن في ناس حوالينا لابسين قناع الحب لحد ما المصلحة هتروح وبعدين يبان وشهم الحقيقي فعلمت نفسي متعشمش أوي في الناس عشان لما يغدروا متعبش أوي والناس الطيبين بجد أكيد هيبانوا ويبهرونا بحبهم وثباتهم الطويل اللي مش مشروط ولا قائم على مصلحة يعني برضو مش هنظلم حد كويس بس هنلغي فكرة التسرع في العشم الزائد".
تامر حسني: كل يوم يا بسمة بحكي لولادنا عن تعبك معاهم
وأضاف: هاجي بقى لنقطة نفسية غريبة أنا كل ما تكون أيد أمي على راسي والله والله والله بحس لو تعبان إني مرتاح لو مهموم، إني مبسوط وكأنها بتشفط و بتسحب أي طاقة سلبية مش كويسة وتحطلي طاقة جميلة كلها خير و راحة، الأيام اللي غصب عني مش بعرف أشوفها فيها بكون متوتر قلقان ولما بشوفها بقول في سري أنا بحمد ربنا عشان أتولدت لقيت الست دي أمي،
يلا نوريهم قد ايه بنحبهم و اللي مزعل أهله يروح فوراً يصالحهم يلا عندك سبب جميل اهوه جه من عند ربنا متخافش روح صالح ربنا هيكون معاك وهيخليك مجبور الخاطر صدقني …..وأكيد أتمنى لو يفضل ده شكل علاقتنا بيهم طول الحياة مش بس في عيد الأم ،، كل سنة وأنتي طيبة يا أمي.
كل سنة وأنتي طيبة يا بسمة وكل سنة ووالدتك الجميلة طيبة… أنا كل يوم يا بسمة بحكي لولادنا عن الاصول دي ومصورلهم كل تعبك معاهم من وانتي لسه هعدي عصبيتك عليا في الوقت ده مش مشكلة حقك، المهم مصورلهم مجهودك لحظة بلحظة عشان يعرفوا انتي وأنا تعبنا عشانهم ازاي ولما يكبروا إن شاء الله هما يعملوا كده مع ولادهم، وكمان يراعوا ربنا فينا لما احنا نكبر اوي، إن شاء الله هتشوفي فيهم كل الخير، عشان انتي أم جميلة ومخلصة ليهم قدام ربنا.. كل سنه و كل أم في الدنيا طيبة و يلا ندعي لكل أم مش معانا ربنا يرحمها ويرفع من قدرها في الجنة.
اقرأ أيضاً:جمال العدل يطرح محتوى خاص بذوي الهمم في بودكاست في رمضان
