أحمد مالك: "اتعرضت للتنمر بسبب شكلي ووهبت حياتي للفن"
كشف الفنان أحمد مالك عن تفاصيل بداياته الفنية ومرحلة طفولته، مشيرًا إلى أنه تعرض للتنمر في مراهقته المبكرة بسبب بنيته الجسمية.
قال أحمد مالك في حواره مع الإعلامي أنس بوخش، في برنامج AB Talks: “أنا بدأت الشغلانة وأنا صغير أوي، أول مرة وقفت قدام الكاميرا كان عندي 8 سنين، وكنت بعمل إعلان مكرونة والمكرونة كانت نية علشان شكلها يبقى حلو، وكنت باكُلها وكنت عايز أرجع ولكن مينفعش، المفروض التجربة دي لطفل مش حلوة، ولكن أنا كنت مبسوط زي يوسف عثمان في فيلم بحب السيما”.
تصريحات أحمد مالك
وتابع أحمد مالك: “كنت بدخل اللوكيشن وأنا عندي 9 سنين كنت بحس أنه شيء بيكسر كل الواقع اللي كنت عايش فيه، وكنت بحس بالأمان في اللوكيشن وكان عندي 13 سنة، أنا عندي الجوع بتاع إني معملتش حاجة، مع إني عملت كتير، أنا مش عارف أنا عملت إيه مع إني الحمد لله اشتغلت كتير وعملت حاجات كويسة وممتن للمهنة جدًا”.
واستكمل أحمد مالك: “رؤيتي لنفسي وذاتي مرتبطة قوي برؤيتي لمهنتي، وأنا معتقدش إني هعرف أعمل حاجة زي ما بعمل فن، والتمثيل اختارني من وأنا صغير جدًا وخلاص القدر اختار ده فأنا جزء من ده، وقررت إني هوهب حياتي والمعنى بتاعي هو الفن، ولو هختار حاجة غير التمثيل هتبقى الكتابة”.
أحمد مالك: كنت بحس بخذلان من شكلي
وعن مرحلة طفولته، قال أحمد مالك: “كنت طفل فضولي قوي، وأنا صغير مكنش عندي ثقة في نفسي وده بينعكس دلوقتي، وكنت دايمًا بحس إني مش قوي بدنيًا وبحس بخذلان من هيئتي وشكلي، وتعرضت للتنمر في مراهقتي المبكرة وكنت بتكسف جدًا وطول الوقت عايز استخبى”.
اقرأ أيضًا: بسمة بوسيل: "مبقدرش أغفر الخيانة وهرفض إن بنتي ترتبط بشخص مشهور"
