حمادة هلال: كنت عارف أن أحمد فهمي معايا في حلقة رامز جاب من الآخر
كشف الفنان حمادة هلال كواليس مشاركته في برنامج "رامز جاب من الآخر" في حلقه جمعته بالفنان أحمد فهمي.
تصريحات حمادة هلال
قال حمادة هلال خلال لقائه في برنامج "الراديو بيضحك" من تقديم فاطمة مصطفى عبر إذاعة "الراديو 9090": "روحت البرنامج قبلها بـ8 ساعات، جالي تليفون لازم تسافر لدبي هتروح لرامز جلال، عجبني فكرة البرنامج أنه خلاص رايح أقابل رامز وعارف أنه مش هيسيبنى، وهناك فعلا مش بيقولوا إيه المقلب، لكن عرفت أن أحمد فهمي هيكون معايا عشان منبقاش كدابين".
وتابع حمادة هلال: "انا مفيش مشكلة بيني وبين أحمد فهمي، فكانت حلقة مختلفة وآخر حلقة اتصورت، لما شفت الكلب اتخضيت بس أنا مخفتش منه فجأة لقيتني وقفت، لأن إحنا كان عندنا في "المداح" كلب شبه وبقيت بسأل دا إيه اللي جابه هنا هو دا المقلب، حتى السير اتحرك ووقعني، كانت حلقة حلوة وانبسطت وكنت في فترة ضغوط تصوير "المداح" لكن الحلقة فرحتني، اتمرمطنا جامد ونزلنا في مايه متلجة، وأخدت ضربه جامده في راسي".
حمادة هلال في رامز جاب من الآخر
واختتم حمادة هلال حديثه قائلا: "رامز أروح له في أي حته، طالما البرنامج إحنا مش بنمثل على الناس بتبقى المصداقية بتاعته عالية، أنا روحت لـ "رامز قرش البحر" مكنتش اعرف أنه رامز وانفعلت في آخر الحلقة انفعال عمري ما حصل في حياتي كانت لحظة صعبة، وبرامج رامز معظمها الناس متعرفش".
اقرأ أيضاً:أنتِ مفتاح الحياة.. أصالة توجه رسالة دعم للسيدات في يوم المرأة العالمي
