ماندو العدل عن هشام عاشور: مدخلش التمثيل بالواسطة وهو فنان موهوب

رد المخرج ماندو العدل على مهاجمي الفنان هشام عاشور لمشاركته في مسلسل عملة نادرة مع زوجته نيللي كريم، وأشار أنه لم يدخل الوسط الفني بسبب زوجته بل لأنه فنان حقيقي وموهوب.

تصريحات ماندو العدل

وقال ماندو العدل في تصريحاته على الراديو 9090: "الناس بتهاجم هشام عاشور لأنه زوج نيللي كريم ومعتقدين إنه بيشارك في الأعمال الفنية بالواسطة، ولكن هو اشتغل معايا قبل كدة في فيلم الملحد، بس الفيلم لسه منزلش وبالنسبة لمشاركته في مسلسل عملة نادرة ده كان بسبب أن أنا اللي رشحته للمسلسل، ومش فارق معايا طريقة الناس في التفكير المهم النتيجة وهو فنان موهوب".

وأكمل ماندو قائلًا: "هشام مش شغال في الوسط لأنه زوج نيللي.. بالعكس هو تعاون مع ممثلين كتير منهم الفنانة يسرا، بلاش نهاجمه وخلينا نحكم عليه من موهبته فقط، وبقول للمشاهد بلاش تحكم عليه غير بعد ما تتفرج الأول".

كما رد المخرج ماندو العدل على الشائعات حول خلاف نيللي كريم ومحمد رمضان في فيلم ع الزيرو، وقال: "أنا معنديش أي معلومة عن وجود الخلاف اللي بين نيللي كريم ومحمد رمضان في فيلم ع الزيرو، بالعكس نيللي صورت الفيلم وكل حاجة كانت عاجباها وكانت مبسوطة بمشاركتها في الفيلم وبالدور وفي آخر يوم تصوير شكرتنا كلنا".

وتابع ماندو العدل حديثه وقال: "نيللي بقالها فترة طويلة جدا من رمضان وهي مخدتش إجازة وسافرت، إنما مش زعلانة ولا علقت على الأفيش، ونيللي والعدل جروب مع بعض من سنين كتير وحققنا نجاحات ضخمة مع بعض، ولو فيه أي حاجة اتفقنا عليها أكيد هتتعمل، وأنا بأكد إن مفيش خلاف".