بعد بنت الجيران.. اتهام حسن شاكوش بسرقة لحن أغنيته قنبلة الجيل من محمد حماقي

أعلن الناقد الفني أكرم ناجي عن مفاجأة حول أغنية "قنبلة الجيل" لمطرب المهرجانات حسن شاكوش، والتي تم طرحها في مسلسل العتاولة برمضان 2024.

قال أكرم ناجي في فيديو عبر صفحته بموقع فيس بوك، إن الأغنية مسروقة من ألحان أغنية “في حضن عنيك” للمطرب محمد حماقي، وأن هذه تعتبر المرة الثانية التي يسرق فيها حسن شاكوش لحن اغنية للمطرب محمد حماقي بعد أغنية بنت الجيران.

وتابع أكرم ناجي: “أغنية قنبلة الجيل نجحت في موسم رمضان 2024 ومن أهم أسباب نجاحها طرحها ضمن أحداث مسلسل العتاولة بطولة أحمد السقا، وعاملة شغل حلو على تيك توك، ولما سمعت الأغنية خدت بالي أن الجملة دي سمعتها قبل كده”.

سرقة لحن أغنية قنبلة الجيل

وأضاف: “قولت مين حبيب شاكوش غير حماقي، هو اللي نجحه وصيته من وقت أغنية بنت الجيران وخلاه في حتة تانية، لما برضه شاكوش سرق ألحان أغنية بنت الجيران من محمد حماقي، فضلت أفتكر لحد ما جبتها واكتشفت إنها أغنية في حضن عنيك، وكنت مستغرب إن الأغنية نجحت”.

واستكمل أكرم ناجي: “أنا مش ضد حسن شاكوش ولا عمر كمال ولا حمو بيكا ومش بهاجم ولا بروش، لكن أنت لو بتعمل شكل معين وهو شكل المهرجانات فأنت داخل في مرحلة الممل، اطلع بلحن جديد أو أي حركة، لكن الاستستهال عبث بصراحة”.

أكرم ناجي: حسن شاكوش وعمر وحمو نجاحهم غير مستمر

وأكد أكرم ناجي: “من 3 سنين مفيش أغنية ليهم هما التلاتة ضربت زى الأغاني اللي فاتت، وده بيدل على حاجات كتير أوي وسبق وقلت أن الناس هتمل من الرتم الواحد وهيكون فيه حاجات أحلى وأجرأ لكن الأسلوب اللي هما شغالين عليه مش هيستمر”.

واختتم حديثه قائلًا: “ملاحظ إن عمر كمال وحسن شاكوش بقا عندهم غرور زايد في لقاءاتهم التلفزيونية وبحس أنهم قدموا حاجة مهمة لكن النجاح نسبي وأحيانًا بيكون مؤقت والأهم هو الاستمرارية في النجاح، وسؤال ليهم هل عملت 10 أغاني ناجحين في 4 أو 5 سنين، هما 4 أو 5 أغاني والباقي واقع أوي وكفاية سرقة”.

اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة