رانيا يوسف: "المخرجين شايفين جمالي فقط وبجري ورا منتجين عشان فلوسي"
تحدثت الفنانة رانيا يوسف، عن علاقة الفنان بالمخرج، مؤكدة أن المخرجين يتعاملون معها على أساس الشكل وليست الموهبة.
قالت الفنانة رانيا يوسف خلال ورشة توجيه الممثل ضمن فعاليات مهرجان أسوان الدولي لأفلام المرأة: “لما بيجيلي أعمل أوديشين بروح ومش بتكسف، ولقيت إني بنجح أكتر لما بشتغل مع المخرج اللي مش شايف شكلي زي الأستاذ محمد ياسين، وأحسن أدواري كانت معاه، والمخرجين اللي بيشوفوا الفنان من جوه مش الشكل الخارجي بس قليلين أوي، وعشان كدة للأسف معظم شغلي طول الوقت مع مخرج شايفني ست شكلها حلو من وجهة نظره”.
رانيا يوسف: بحاول مبقاش مهتمة بشكلي على قد ما أهتم بالدور
وأضافت رانيا يوسف: “دلوقتي بقيت اسم، وبحاول أشتغل إني مبقاش مهتمة بشكلي على قد ما أهتم بالدور، بس في الآخر بترجع للمخرج، ولما بقعد مع المخرج بعرف من أول 5 دقايق معاه هو عايز إيه مني، عايز رانيا بشكلها الخارجي، ولا عايز رانيا الممثلة”.
واختتمت رانيا يوسف حديثها، قائلة: “لازم المنتج يلتزم بتسليم دفعة الممثل لإن كتير بشتغل مع منتجين بيأخروا الدفعات عليا، ويقولي بكرة هجبلك الدفعة وميجبش وأفضل أجري وراه بالشهور”.
اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة
