"متجوزتش بعده".. نادية شكري تكشف سبب انفصالها عن سامي العدل وقصة حبهما
تحدثت الفنانة نادية شكري عن سبب انفصالها من الفنان الراحل سامي العدل، مؤكدة أن الغيرة هى السبب الرئيسي في انفصالهما.
قالت الفنانة نادية شكري خلال لقائها في برنامج الستات ما يعرفوش يكدبوا: “الغيرة من أهم أسباب الانفصال، خاصة أني كنت صغيرة قوي لأننا اتجوزنا وخلفنا وأنا طالبة لسة، فكنت عيلة ومكنتش مدركة الحياة، وأنا في بيت أهلي كنت مدلعة وفي مدارس فرنساوي ومش واخدة على الجو ده”.
قصة حب نادية شكري وسامي العدل
وتطرقت نادية شكري بالحديث عن قصة حبها من سامي العدل، وقالت: “لفت نظري إن صوته غليظ وعرفنا بعض في خناقة وجر شكلي واستفزني وإحنا في المعهد، وشدينا مع بعض وبعدها صالحني وبعدها الحب حصل وهو حنين أوي وقلبه طيب”.
وتابعت: “لو رجع بيا الزمن متطلقش بدليل إني ما اتجوزتش بعديه، وأهله أهلي لحد اللحظة دي وهم سندي بعد ربنا حتى التعامل بعد الانفصال كأنهم أخواتي ومامته بتعشقني لحد دلوقتي، ومش بيعاملوني على أني كنت مرات سامي أو أم رشا أنا بالنسبة لهم حد خاص”.
أما عن ابنتها رشا سامي العدل، قالت نادية شكري: “رشا كوكتيل مني ومن والدها سامي وفيه حاجات مشتركة بيني وبين سامي خدتها مننا إحنا الاتنين زي الطيبة والحنية، وأنا كمان متهورة لما حد يضايقني بكون حساسة أوي فاتقلب 180 درجة أزعق على مفيش وأعيط بسرعة، وأى حد مزعلني وييجي يطيطب عليا باخد على خاطري وأفضل أعيط، لأني أنا عيوطة وكذلك الجدعنة ومبذرين مبنعرفش نحوش قرش”.
اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة
