أكرم حسني: محمد سامي كان المخرج الأصلي لـ العميل صفر
كشف النجم أكرم حسني أن المخرج الأصلي لآخر أعماله السينمائية فيلم "العميل صفر" كان المخرج محمد سامي، الذي قام بالفعل بتصوير أسبوع واحد فقط من العمل.
تصريحات أكرم حسني
وقال أكرم حسني في تصريحات تلفزيونية في برنامج "تفاعلكم" مع الإعلامية سارة دندراوي، والمذاع عبر شاشة قناة العربية: "فكرة الفيلم طلعت في مرة كنا قاعدين أنا والمخرج محمد سامي في أحد المهرجانات، وبعد ما رجعنا القاهرة كلمني وقال خلينا نقعد نتكلم لإن خيوط الفكرة بدأت تكتمل، وقعدنا هو يقول فكرة وأنا أزود بفكرة لحد ما بقى عندنا فكرة فيلم لذيذ".
وأضاف أكرم حسني: "وبعدها لما عرضنا الفكرة على المنتج والسيناريست وائل عبد الله تحمس جدًا، وصورنا حوالي أسبوع ولما جينا عشان نكمل كان محمد سامي انشغل في أعمال تانية ومواعيده أصبحت لا تسمح أنه يكمل معانا".
وتابع أكرم: "استأذنا محمد سامي في أننا نرشح مخرج آخر للعمل ورحب جدًا، وكلمنا المخرج اللي بحبه جدًا كريم العدل ورحب أوي بالعمل وبدأنا نشتغل تاني، ودايما بقول إحنا خسرنا محمد سامي وكسبنا كريم العدل".
أكرم حسني يتحدث مازحًا عن مشاهد الأكشن
كما صرح الفنان أكرم حسني بأنه أصيب بحالة من الرعب أثناء تصوير مشاهد من فيلم "العميل صفر" في الغردقة، بسبب ظهور القرش وقال: "إحنا صورنا في الغردقة بعد ظهور القرش بأسبوع، وعملت فيها إني جريء وأنا من جوايا كنت مرعوب في البحر، وافضل أبص يمين وشمال وأول ما يقولوا أكشن أحاول أنسى واركز في المشهد".
وسبق أن سخر أكرم حسني من التعليمات التي انتشرت على مواقع التواصل الاجتماعي للتعامل مع القرش وعلق: "شوفنا التعليمات على السوشيال ميديا، بس يعني إيه لو ظهر قرش أبص في عينيه!".
كما تحدث أكرم حسني مازحًا من مشاهد الأكشن التي صورها بنفسه في الفيلم قائلًا: "بالعقل كده، أنا ممكن أعمل أكشن إزاي؟ أنا ساعات كنت محتاج دوبلير ليا وأنا طالع السلم".
وتابع أكرم حسني ساخرًا من نفسه قائلًا: "أنا عملت حاجات بسيطة زي إني انط من اليخت في الغردقة واعوم، لكن في حاجات زي القفز من دور لدور تاني دي محتاجة السقا ييجي يعملها، لكن إحنا البني آدمين العاديين منقدرش لأ".
